Atap aıtqanda, Memleket basshysyna Qazaqstannyń Reseımen qarym-qatynasy jóninde, Ýkraına tóńiregindegi qaqtyǵystarǵa qatysty jáne sanksııalardy saqtaý týraly suraqtar qoıyldy.
«Shyn máninde, Qazaqstan men Reseıdiń arasyn álemdegi eń uzyn qurlyqtyq shekara bólip jatyr. Elderimiz arasynda saýda, gýmanıtarlyq baılanystar boıynsha dástúrli yntymaqtastyq ornaǵan. 2013 jyly eki el Odaqtastyq qarym-qatynas týraly shartqa qol qoıdy. Ýkraınadaǵy qaqtyǵysqa keler bolsaq, Qazaqstan áskerı is-qımyldardyń tez arada toqtatylýyn jáne BUU Jarǵysy negizinde beıbit kelissóz júrgizilýin jaqtaıdy. Men búgin qurmetti Kansler myrzaǵa jaǵdaıdyń shyn máninde óte kúrdeli ekenin aıttym. Reseı de, Ýkraına da kelissóz júrgizýge daıyn ekenin rastaıdy. Alaıda kelissózdiń qandaı alańda júrgiziletini ázirshe belgisiz. Sondyqtan parasatty, salmaqty, salıqaly dıplomatııanyń kezeńi týady dep oılaımyn. Olar birin-biri aıyptaýdy doǵaryp, eki jaqqa da tıimdi kelissózdiń jolyn tabýy kerek. Qazaqstan Ýkraına qaqtyǵysyn sheshýdiń qandaı da bir joldaryn usynyp jatqan ózge elder men memleketter tobynyń kúsh-jigerin qoldaıdy. Biz óz tarapymyzdan barlyq qajetti sharany qabyldaımyz. Al Qazaqstan men Reseıdiń shekarasyna keler bolsaq, oǵan delımıtasııa jasalyp, aıtarlyqtaı deńgeıde demarkasııalandy. Ony eki el parlamentteri naqtylap, tıisti qujatty ratıfıkasııalady. Sondyqtan Reseımen arada qandaı da bir terrıtorııalyq daý joq. Qazaqstan men Reseı ekijaqty deńgeıde jáne tıisti ıntegrasııalyq birlestikter aıasynda turaqty dostyq qarym-qatynas ornatqan. Sanksııany aınalyp ótý máselesine keler bolsaq, Qazaqstan sanksııa rejımin múltiksiz saqtaıtynyn málimdedi. Biz sankııa rejımin saqtaý jóninde tıisti uıymdarmen udaıy baılanystamyz. Germanııa tarapynyń sanksııa rejımin aınalyp ótý yqtımaldyǵyna qatysty eshqandaı kúmáni bolmaýǵa tıis dep oılaımyn», dedi Qasym-Jomart Toqaev.
