Foto: Beınekadr
«Azııa oıyndaryna shaqyrtý alǵan kezde qatty qýandym. Eń alǵashqy úlken jarys bolǵandyqtan qobaljý da boldy, qobaljý-qorqynyshymdy jeńýge ata-anamnyń qoldaýy járdemdesti», deıdi Erkejan Súleımen.
13 jasar Dilnaz Nyǵmetjanovnyń kógaldaǵy hokkeımen aınalysyp júrgenine jeti jyldan asqan. Biraz jetistikke jetip úlgergen ol sport sheberi ataǵyna úmitker jáne eń úzdik jas sportshy ataǵyn alǵan.
«Bul meniń tuńǵysh Azıadam. Basty armanym - Qazaqstannan shyqqan tuńǵysh álem chempıony ataný», deıdi Dilnaz Nyǵmetjanova.
Qazaqstan quramasy Azııa oıyndary bastalmas buryn Úndistanda oqý-jattyǵý jıyndaryn ótkizgen. Aıta ketsek, Úndistan, Qytaı, Japonııa komandalary hokkeıden álemniń úzdik quramalary sanalady. Sol sebepti Azıadada básekelestik deńgeıi óte joǵary bolǵaly tur.
«Komandanyń bolashaǵyn oılaǵandyqtan qabiletterine qaraı osy eki qyzdy tańdap, Azııa oıyndaryna alyp keldik. Sebebi osyndaı dárejedegi jarystar keremet tájirıbe beredi. Bolashaqta osy jas sportshylar ulttyq quramany jeńiske jeteleıdi dep úmittenemiz», dedi kógaldaǵy hokkeıden Qazaqstannyń qyzdar quramasynyń bas bapkeri Nurjan Beıbitov.
Aıta ketý kerek, búgin kógaldaǵy hokkeıden Qazaqstan qyzdar quramasy Indonezııany 2:1 esebimen utyp, Azııa oıyndarynda alǵashqy jeńiske qol jetkizdi.
