Eskekshiler eńsemizdi kóterdi
Kanoede eskek esýden altyn bolady-aý degen habar taraǵannan keıin, barlyq jýrnalıst tań atpaı «Fuyang Water Sports Centre»-ge jınaldy. Sebebi jergilikti ýaqyt boıynsha saǵat 9:00-de bastalatyn jarysqa qonaqúıden jetý úshin kem degende bir saǵattan asa ýaqyt júrý kerek edi. Onyń ústine Sergeı Emelıanov pen Tımýr Haıdarov bastaǵan eskekshilerdiń altyn alatynyna barlyǵymyz sendik. Senim aqtaldy da. Nátıjesinde, araǵa birneshe kún salyp, Qazaqstan qorjyny tórtinshi altyn medalmen tolyqty.
S.Emelıanov pen T.Haıdarov bastaǵan jup 500 metrlik qashyqtyqta qarsylastarynan anaǵurlym ozyp, Azııa oıyndarynyń altyn júldesine ıe boldy. Sportshylarymyz jeńisten keıin tilshilermen tildesip, aldaǵy josparlary týraly aıtty.
– Emosııa degen keremet! Buǵan deıin eki Azııa oıyndarynda kúmis júlde aldym. Úshinshi Azııa oıyndary men úshin sátti bastaldy. Alǵashqy qashyqtyqta altyn aldyq. Erteń Tımofeı Emelıanovpen 1000 shaqyrymda baq synap, barymyzdy salamyz. Jeńis bolady dep úmittenemin. Kóńil kúı – óte keremet! Márege birinshi bolyp jetý erekshe sezim eken. Elimizge altyn medal ákelgenimizge qýanyshtymyz. Taǵy qaıtalaımyz degen oıdamyn. Bári oılaǵandaı ótti. Biz óz jumysymyzdy atqardyq. Nátıjesinde, qashyqtyqty senimdi túrde ıgerip, birinshi keldik, – dedi Sergeı Emelıanov.
Tımýr Haıdarov jospary tolyǵymen iske asqanyn jetkizdi.
Araǵa sál ýaqyt salyp Qazaqstan áıelder quramasy baıdarka men kanoede eskek esýden eki kúmis medal jeńip aldy. Juptyq synda (500 metr) Marııa Brovkova men Rýfına Ysqaqova kúmis medalǵa qol jetkizdi. Bul saıysta Qytaı birinshi oryndy jeńip alsa, Taıland úshinshi oryndy ıelendi.
Al baıdarka jarysynda (500 metr) juptyq synnyń fınalynda Qazaqstan quramasy ekinshi oryn aldy. Osylaısha, otandyq sportshylar Irına Podoınıkova men Olga Shmeleva kúmis medaldy qorjynǵa saldy. Bul saıysta Qytaı quramasy máre syzyǵyna birinshi bolyp jetse, úshinshi oryn О́zbekstan quramasyna buıyrdy.
Otandastarymyz báseke sońyna deıin tartysty bolǵanyn aıtady.
– Biz altyn alamyz dep oıladyq. Biraq bul – sport. Barymyzdy saldyq. Bapkerler sońyna deıin qarsylastardy alǵa jibermeýimizdi talap etti. Biz qalaı bastasaq, sol qarqynmen márege de jettik, – dedi O.Shmeleva.
Erler arasynda baıdarkadan jekeleı synda (1000 metr) Kırıll Týbaev qola medal enshiledi. Altyn medal qytaılyq Dýn Chjanǵa buıyrsa, kúmis júldeni ózbekstandyq Shahrıer Mahkamov ıelendi.
Al 1000 metrlik jarysta jekeleı synda Tımofeı Emelıanov márege úshinshi bolyp jetti. Birinshi oryndy taıpeılik Kýan-Che La jeńip alsa, ekinshi oryn ózbekstandyq Vladlen Denısovke buıyrdy.
Batýttaǵy gımnastıkadan el namysyn qorǵaǵan sportshy qyzymyz Vıktorııa Býtolına Azııa oıyndarynyń qola júldegeri atandy. Básekeniń fınalynda Vıktorııa 52,600 upaı jınap, Qytaı quramasynyń sportshylary Sıýeın Chjý (altyn) men Icheng Hýdan (kúmis) qalyp qoıdy.
Aıta keteıik, 18 jastaǵy Vıktorııa Býtolına úshin bul – alǵashqy Azıada. Al Sıýeın Chjý osy baǵdarlamada Tokıo Olımpıadasynyń chempıony atanǵan.
Sý dobynan altyn buıyrsa…
Sońǵy jeti Azııa oıyndarynda alty ret altyn medal utyp alǵan sý dobynan Qazaqstannyń erler quramasy jarysty jaqsy nátıjemen bastady. Sportshylarmyz Gonkong komandasymen kezdesip, 25:4 esebimen senimdi jeńiske jetti. Búgin el quramasy Japonııamen baq synasatyn bolady.
Jarys jolynda – jeńil atletter
Keshe keshke jeńil atletter jarys jolyna shyqty. Alty baǵdarlama boıynsha synǵa túsken sportshylarymyz eki qola medal jeńip aldy.
Qyzdar arasynda Adelına Zems 400 metrge kedergimen júgirý saıysynda 57,16 sekýnd nátıjesimen 3-orynǵa ıe boldy.
Al Adelına Zems, Efım Tarasov, Anastasııa Zalıýbovskaıa jáne Dmıtrıı Kolbov bastaǵan komandalyq estafetada Qazaqstan quramasy qola júldeni ıelendi. Negizi jerlesterimiz máre syzyǵyn tórtinshi bolyp kesken edi. Alaıda Shrı-Lanka komandasy jarys erejesin buzǵany úshin júldegerler qatarynan alynyp tastaldy.
Aýyr atletter «nokaýt» aldy
Aýyr atletterden maza ketkeli qa-shan! Burynǵydaı syńǵyrlatyp altyn alatyn kezeńder kelmeske ketken sekildi. Áıtpese, Azııa oıyndarynda aýyr atletterimizdiń V tobynda synǵa túskeni ersi kórinedi eken. 59 kıloda synǵa túsken Altynaı Táńirbergenova men Darıa Balabaıýk 8-9-oryndarǵa jaıǵassa, Rıo Olımpıadasynyń qola júldegeri Karına Gorıcheva (64 kg) bar-joǵy besinshi orynnan kórindi (A toby).
Sonymen qatar bul kúni shahmattan qyzdar quramasy Vetnam quramasyn 3:1 esebimen jeńdi.
Qazaqstannyń basketbol quramasy jeńilis tapty. Erler arasyndaǵy jarystyń 1/8 fınalynda Qazaqstan Taıpeı quramasymen kezdesti. Alaıda otandastarymyz bul matchta jeńiske jete almady. Kezdesý 62:83 esebimen qarsylastardyń jeńisimen aıaqtaldy.
Al voleıboldan Qazaqstan áıelder quramasy da japonııalyq qarsylastaryna ese jiberdi. Toptyq kezeń aıasynda ótken bul matchta voleıbolshylarymyz 17:25, 20:25, 13:25 esebimen jeńilip qaldy.
Tramplınnen sýǵa sekirý irikteýinen súrinbeı ótken Nazar Qojanov fınaldyq synda 10-orynnan kórindi.
