Sýretterdi túsirgender – Nurǵalı Jumaǵazy, Salı Sabırov, Turar Qazanǵapov (Sportty damytý dıreksııasy) Aqparattyń jaryq kórýine qoldaý jasaǵan «Samuryq-Qazyna» UÁQ» AQ jáne «Týrızm ındýstrııasy men sportty qoldaý qory» KQ.
Bekádil ShAIMERDENOV:
– Buryn dzıýdoshy edińiz, qazir kýrashpen aınalysyp júrsiz. Dzıýdodan birjolata kettińiz be?
– Iá, men – dzıýdoshymyn. Kýrash dzıýdoǵa uqsas bolǵandyqtan osy sport túrimen bıyldan bastap shuǵyldanyp kelemin. Meni jeńgen ózbek balýanynan Azııa chempıonatynda basym túsken edim. Bul joly onyń baǵy jandy. Alda qaı kúres túrimen shuǵyldanatynymdy bapkerlermen aqyldasýymyz kerek.
– Fınalǵa deıin súrinbeı jetken sizdi sheshýshi aıqasta tanymaı qaldyq. Qarsylasyńyzǵa ne sebepti ese jiberip qoıdyńyz?
– Jartylaı fınalda qarsylasymdy qosymsha ýaqytta ázer jeńdim. Sondyqtan fınaldyq beldesý úshin beriletin 15 mınýt men úshin qysqardy. Sebebin joǵaryda aıttym. Onyń ústine fınalda kúresken ózbek sportshysy meniń aldymda kúresip ketken. Sondyqtan ol tyń bolyp shyqty. Áıtpese ol balýannyń jaýyrynyn jerge tıgizetindeı shamam bar edi.
Saǵyndyq TOǴAMBAI:
– Qarsylasyńyz týraly aıtyp berseńiz, «jekpe-jekti satyp jiberdi» degen áleýmettik jelide jazyp jatqan qaýesetke ne aıtasyz?
– Biz eshqashan satylǵan emespiz, satylmaımyz da. Bul – qate pikir, qate aqparat. Jartylaı fınaldaǵy Qytaı boksshysymen bolǵan aıqas men úshin óte qıyn jekpe-jektiń biri boldy. Negizi, ońaı jeńetin boksshy edi. О́zim qıyndatyp aldym. Qolymnyń uzyndyǵyn paıdalanyp, uryp shyǵýym kerek-tuǵyn. Onyń ústine qarsylasym qanshama soqqy alsa da, eseńgireýdi, artqa jyljýdy bilmeıdi jáne sharshamaıdy eken. Ony buǵan deıin halyqaralyq jarystarda kórmegenmin. Fınalǵa shyqqanymda Parıj Olımpıadasynyń joldamasyna ıe bolatyn edim. Sondyqtanda qola medalǵa kóńilim tolmaı tur.
– Jeti boksshydan tek ekeýi ǵana jarysty jalǵastyratyny belgili. Komandadaǵy kóńil kúı qalaı?
– Qazaq boks mektebin kórsete alatyndaı qabiletimiz bar. Biz kez kelgen jaǵdaıǵa daıynbyz. Jigitterdiń kóńil kúıi jaqsy. О́mir osymen toqtap qalmaıdy. Ári qaraı jattyǵýymyzdy jalǵastyra beremiz. Jarys jolynda qalǵan eki boksshy aǵalaryma sáttilik tileımin.
– Tashkentte ótken álem chempıonatynda 86 kg salmaqta judyryqtasqan edińiz. Bul joly 92 kg salmaqta rıng tórine kóterildińiz. Jartylaı fınaldaǵy jeńilisińiz osyǵan baılanysty emes pe?
– Joq, olaı emes. 92 kg men úshin qolaıly salmaq. Keshegi jeńilisim maǵan úlken sabaq boldy. Maqsatym – Olımpıada joldamasy. Qarasha aıynda Semeı qalasynda tórt jylda bir ótetin Qazaqstan spartakıadasy bolady. Sol jarysta kim chempıon atansa, sol kelesi joldama beriletin týrnırge qatysady.
– Joǵaryda taktıkany durys oryndaı almadym dedińiz. Myrzaǵalı Aıtjanov qandaı taktıka qoıyp edi?
– Qolymnyń uzyndyǵyn paıdalanyp, jaqyndatpaı bokstasýym kerek bolatyn. Jekpe-jek bastalǵanda urǵan soqqylarym dóp tıip jatqannan keıin jaqyn qashyqtan uryp, kezdesýdi merziminen buryn aıaqtaǵym keldi. Biraq meni tańǵaldyrǵany, ádette aýyr soqqy ótkizip alǵan qarsylastarymnyń túri ózgerip, soqqy darytpaýǵa tyrysyp, rıngte qashyp júretin edi. Al Qytaı boksshysy soqqyǵa shydaıtyn ákki sportshy eken. Bul kezdesý maǵan úlken sabaq boldy. Endi ol qarsylasymdy kórdim, aldaǵy ýaqytta kezdesip jatsam, basqa taktıka quramyz.
– Qazaqstanda sizdiń basty qarsylasyńyz Azııa chempıony Aıbek Oralbaı bar. 92 kg salmaqta Azııa oıyndaryna irikteý qalaı júrdi?
– Jaz aıynda Astanada elorda kýbogi jarysy ótti. Sol kezde bapkerler alqasy úsh salmaq boıynsha atalǵan jarysta jeńgender Azııa oıyndaryna barady dep barlyq jattyqtyrýshylar men boksshylarǵa aıtty. Úsh salmaqtyń ishinde 92 kg da bar edi. Men sol jarysta chempıon atandym. Aıbek ekeýmiz jartylaı fınalda kezdesýimiz kerek edi. Biraq ol erejeni buzyp, sol kúni salmaǵynyń ósip ketýine baılanysty jarystan shettetildi.
Vıktorııa HRITANKOVA:
– Sý dobynan Qazaqstan quramasy Azııa qurlyǵynda ótetin dodalarda únemi júlde alyp júr. Osy jolǵy basty maqsat qandaı?
– Sońǵy úsh Azııa oıyndarynda kúmis júlde alyp júrgen quramamyzdyń bul jolǵy maqsaty kem degende kúmis júlde alý edi. Sebebi birinshi oryn alǵan Qytaı quramasy bizden myqty. Soǵan qaramastan, olarmen teń dárejede óner kórsettik. Sondyqtan qola medalǵa kóńilimiz tolmaı tur. Áıtkenmen, joqtan jaqsy.
– Myqty degen álemdik komandalarmen qashan teń dárejede synǵa túsesizder?
– О́kinishke qaraı, elimizde qyzdar arasynda sý dobyna qyzyǵýshylyq óte tómen. Qazaqstan chempıonatynda da komanda az. Quramadaǵy qyzdardyń basym bóligi – Taraz qalasy komandasynyń oıynshylary. Sondyqtan da jattyǵýlardyń basym bóligi atalǵan qalada ótedi. Soǵan qaramastan, biz Japonııa, Qytaı, Ońtústik Koreıa sekildi komandalarmen teń dárejede baq synaı alamyz. Al álemdik deńgeıge kóterilý úshin ishki chempıonatqa kóńil bólý kerek. Sonda barlyǵy durys bolady dep oılaımyn.
