foto: Maksım Aleksandrovıch
Atalǵan is-shara bıyl ekinshi ret ótkizilip otyr. Qazaqstan Respýblıkasy Ulttyq Ulanǵa qarasty 3656 áskerı bóliminiń sarbazdary 800 metr bıiktikten parashıýtpen sekirý normasyn oryndady.
«Negizgi ushý quramynyń qyzmetkerleri 800 metr bıiktikten sekiredi. Al qutqarý bóliminiń sarbazdary úshin 1200 – 4000 metr bıktikten sekirý normasy ornatylǵan. Áskerı bólimniń qyzmetkerleri 2 ret sekirýge mindetteledi. Eger sekirmese ushý mindetterinen bosatylady», dedi QR UU bas jetekshisi Dmıtrıı Anatolevıch.
Sondaı-aq parashıýtshylardyń jerdegi daıyndyq kezeńinde mindetti túrde psıhologtarmen jumys júrgizýi josparǵa kiristiriledi. Mamannyń aıtýynsha, ushý alańynda sarbazdardyń kóńilin aýlap, jigerlendirý úshin arnaıy ánder qosylady.
«Psıhologtar ushý jáne sekirý kezinde denede bolatyn fızıologııalyq prosester týraly, ózin-ózi basqarý ádisi týraly aıtady. Keıbir sarbazdar sekirýge daıyn bolyp turǵanymen, týra sekirer aldynda qobaljýy múmkin. Ushý alańynda júrgen kezde ár sarbazdy baqylap júremin. Eger qobaljyǵandaryn kórsem, árqaısysyna jeke-dara kómek kórsetemin. Olardyń kóńilin kóterip, rýhtandyrý úshin án qosyp qoıamyn», deıdi Psıhologııalyq qoldaý qyzmetiniń basshysy aǵa leıtenant Ǵalııa Mustafına.
Búgin tikushaqtan sekirgen sarbazdardyń ishinde alǵashqy sekirýlerin oryndaǵan qyzmetkerler de boldy. Sonyń biri 3656 áskerı bóliminiń jaýyngeri Erlan Qadyrbekuly óziniń sezimimen bólisti.
«Birinshi ret sekirgeli turmyn. Tolqý bar. Kishkene qorqynysh ta bar. 1 aptadaı ýaqyt daıyndyqqa ketti. Onyń ishinde oqý-jattyǵýlar, sondaı-aq psıhologııalyq daıyndyqtar boldy. Biz úshin parashıýtpen sekirip, tájirıbe jınaý mindetti», deıdi ol.
Sonymen qatar biraz tájirıbe jınaǵan taǵy bir sarbaz óziniń sátti qonýynan keıingi sezimin aıtyp berdi.
«Kóńil kúı tamasha. Bul meniń alǵashqy sekirýim emes. Teorııalyq daıyndyqty eske salyp, parashıýtti basqardyq. Ádemi qonys boldy. Meniń túsingenim boıynsha, parashıýtpen sekirgenniń eń qıyn tusy – qonǵan jerińnen qaıttan ornyńa kelý», deıdi ol.
Nusqaýshy mamannyń aıtýynsha, parashıýtpen sekirý jattyǵýlarynyń úsh túri bar. Birinshisi - jerdegi daıyndyq. Bul daıyndyq túri buryn múldem sekirmegenderge arnalǵan. Ol belgili bir ýaqyt aralyǵynda júzege asyrylady. Ár sabaq eki saǵatqa sozylady. Ekinshisi - aldyn ala daıyndyq kezeńi. Bul daıyndyqqa tolyq bir jumys kúni arnalady. Bul kezde sarbazdar nysanaǵa sekirýdi jáne parashıýt júıelerin ornalastyrýdy úırenedi. Eń sońǵy úshinshi daıyndyq túri - sekirý aldyndaǵy aldyn ala daıyndyq.
Aıta keteıik, búgingi parashıýtpen sekirý jattyǵýynda 15 sarbaz tájirıbesin arttyrdy. Olar 800-1200 metr bıiktikten parashıýtpen sekirdi.
