Elordamyzda 3 qazanda Shýsha kúnderine arnalǵan merekelik kesh ótti. Keshte qalanyń tarıhı hám rýhanı mańyzyna nazar aýdarylyp, ázerbaıjan mádenıeti jóninde sóz qozǵaldy. Is-sharaǵa halyqaralyq túrki qorlarynyń qyzmetkerleri, TÚRKSOI uıymy, Qazaqstandaǵy Túrkııa, Ázerbaıjan, Majarstan elshilikteriniń ókilderi qatysty.
Merekelik keshte sóz alǵan Mádenıet jáne aqparat mınıstrligi Mádenıet komıtetiniń tóraǵasy Kúmis Seıitova Shýsha qalasynyń mádenı kelbetine toqtaldy.
– Biz túrki áleminiń mádenı astanasy Shýsha qalasynyń elordamyzdaǵy kúnderinde bas qosyp otyrmyz. Shýsha áý bastan Ázerbaıjannyń mádenı-qoǵamdyq saıası ómiriniń mańyzdy ortalyqtarynyń biri, ıslam órkenıetiniń rámizi. Onda Murtaza Mamedov, Natavan Hýrshıdbaný sekildi óner sańlaqtary dúnıege kelgen. Baýyrlas qazaq-ázerbaıjan arasyndaǵy mádenı yntamaqtastyq baılanys kún sanap nyǵaıyp keledi, – dedi ol.
Sonymen birge Halyqaralyq Túrki mádenıeti men murasy qorynyń prezıdenti Gıýnaı Efendıeva túrki birligin nyǵaıtýǵa arnalǵan merekeniń keleli tusyn atap ótti.
– Byltyr Túrki mádenıeti men murasynyń halyqaralyq qory atynan Shýsha kúnderiniń ótýi týraly usynysymyzdy bildirgen bolatynbyz. Merekelik is-shara Býrsadan bastaý alyp, Tashkentte jalǵasyn tapty. Mine, búgin Astana qalasynda ótkenine kýá bolyp otyrmyz. Birshama kúnnen soń Shýsha kúnderi Túrikmenstanda jalǵaspaq, mundaı is-sharalar túrki áleminiń arasyn jaqyndatyp, halyqtardy biriktire túsedi, – dedi ol.
Merekelik keshte tanymal ulttyq kıimderi toptamasy kórsetilip, kórermen kózaıymyna aınaldy. Ulttyq naqyshty kıim úlgilerinde Ázerbaıjannyń baı tarıhı murasy men jańa úlgidegi áshekeıleri kórinis tapqan. Munan soń túrki elderi ónerpazdarynan quralǵan «Jeti sulý» toby ónerlerin kórsetip, Abaıdyń «Kózimniń qarasy» ánin oryndady.
Jıynǵa Senat depýtaty Darhan Qydyráli, Túrkııanyń Qazaqstandaǵy Tótenshe jáne ókiletti elshisi Mustafa Kapýdjý, Ázerbaıjan Respýblıkasynyń Qazaqstandaǵy Tótenshe jáne ókiletti elshisi Atalar Atamoglanov, basqa da zııaly qaýym ókilderi qatysty.
Merekelik shara aıasynda Shýsha qalasynyń tumsa tabıǵaty men tarıhı kelbeti, búgingi aıbyndy bederi beınelengen sýretter kórmesi tanystyryldy.
