Foto: sports.kz
Qazaq eliniń maqtanyshy Qamshybek Qońqabaev О́zbekstan boksynyń qara nary sanalatyn Bahodır Jalolovqa qarsy aıqasady. Búgingi aıqas olardyń onynshy ret rıngte toqaılasýy bolyp otyr. Buǵan deıin toǵyz ret jekpe-jekke tústi. Sonyń úsheýinde ǵana Qamshybek Bahodırdi utty.
2019 jylǵa deıin Jalolovtyń jalyn jyǵýǵa Qamshybektiń qaırat kúshi jetetin edi. Odan keıin alty jekpe-jektiń barlyǵynda da Bahodırdiń meımanasy tasyp otyrdy. О́ıtkeni ózbektiń alyby «oıandy». 2021 jyly Tokıoda ótken jazǵy Olımpıadada da jeńiske jetti. Álem chempıonatynda eki márte altyn medal oljalady. Azııa qurlyǵynyń chempıonatynda tórt ret jeńiske jetti. Kezinde Jalolovty bizdiń Ivan Dychko da dińkeletip sabaǵan talaı.
Qamshybektiń jigerin janyp, namysyn qamshylaıtyn shaǵy qazir, óıtkeni ıyǵynda Qazaq eliniń úmiti tur. Boksshylarymyz 2018 jyly Indonezııada ótken jazǵy Azııa oıyndarynan da altyn medalsiz qaıtqan edi. Bul joly sol olqylyqtyń ornyn bútindeý asa aýyr salmaqtaǵy alybymyzǵa júktelip otyr.
