Karateshiler senimdi aqtady
Azııa oıyndarynda elimizdiń karateshileri bıik belesti baǵyndyrdy. Dúbirli dodaǵa kelgen 8 sportshynyń barlyǵy da júldeli orynnan kórindi. 3 altyn, 3 kúmis, 2 qola medal jeńip alǵan karateshiler ózgelerge úlgi bolarlyqtaı nátıje kórsetti.
El namysyn qorǵaǵan Qaısar Alpysbaı qurlyqtyq dodanyń jeńimpazy atandy. 60 kıloǵa deıingi salmaqta baq synaǵan sportshymyz fınalda eki dúrkin Azııa chempıony, kýveıttik Abdýlla Shaabandy jeńip, Azıadanyń altynyna ıe boldy. Asa tartysty ótken jekpe-jek 7:5 esebimen aıaqtaldy.
– Negizi Azııa oıyndaryna daıyndalǵanymyzǵa birshama jyl boldy. Shúkir, eńbek aqtaldy. Fınaldaǵy qarsylasymmen buǵan deıin birneshe ret kezdeskenmin. Sońǵy kezdesýimizde de jeńgen bolatynmyn. Daıyndyq barysy jaqsy ótti. Qıyndyq bolǵan joq. Bizde osy aıdyń sońynda taǵy úlken jarys bar. Álem chempıonaty ótedi. Endi soǵan daıyndyqty bastaımyz, – dedi chempıon.
Karateden ulttyq qurama kóshbasshysy Sofıa Berýlseva Azııa oıyndarynda altyn jeńip alǵan sportshylardyń qataryna endi.
Áıelder arasynda +68 kılo salmaqta synǵa túsken jerlesimiz fınaldyq aıqasta Arıka Gýrýngke (Nepal) esh múmkindik bermeı, altyn medalǵa qol jetkizdi. Sofıa HIH jazǵy Azııa oıyndaryn shırek fınaldan bastap Jýd Oldrýsty (Iordanııa) senimdi jeńgen edi. Arada kóp ýaqyt ótpeı, ol jartylaı fınalda Fılıppın sportshysy Izabel Arıanna Brıtodan basym tústi.
Jalpy, 22 jastaǵy Sofıa Berýlseva Tokıo Olımpıadasy men 2021 jylǵy álem chempıonatynda qola júlde jeńip alǵannan keıin jurt nazaryn ózine aýdara bastady. Sonymen qatar jerlesimiz sporttyń osy túrindegi eń bedeldi jarystyń biri – Premer-lıgada 4 ret altynnan alqa taǵyp, taǵy birneshe márte júldegerler qatarynan kóringen. Azııanyń 2 dúrkin chempıony, buǵan qosa 3 ret kúmis, 1 ret qola medal ıegeri atanǵan. Sondaı-aq S.Berýlseva – byltyr AQSh-tyń Bırmıngem qalasynda ótken XI Dúnıejúzilik oıyndarynda Qazaqstanǵa jalǵyz altyndy syılaǵan sportshy.
Karateshi Nurqanat Ájiqanovty Tokıo Olımpıadasynan beri jankúıerlerge jaqsy tanys. Japon jerinde joly bolmady demeseńiz, jerlesimiz Azııa, álem chempıonattarynda júlde alyp júr. Sol sebepti Nurqanattyń aldynda Azııa oıyndarynda top jarý maqsaty turdy jáne jerlesimiz senimdi aqtady. Karateshimiz Azııa oıyndarynyń alǵashqy aınalymynda Mahammed Shekhý Alamdy (Nepal) 5:0 esebimen utsa, shırek fınalda qyrǵyz sportshysy Nazym Nurlanovtan 3:1 esebimen basym tústi. Al jartylaı fınalda Nurqanat Malaızııa ókili Ragonazan Sharmendrandy 4:3 esebimen jeńdi. Al fınalda ıordanııalyq Hasan Masarsheıhti 8:0 esebimen oısyrata utty.
Rekord tirkep, chempıon atandy
Stend atýdyń skıd baǵdarlamasy boıynsha Qazaqstannyń qyzdar quramasy eń kóp upaı jınap, sary qurlyq oıyndarynyń jeńimpazy atandy.
Stend atýdyń skıd baǵdarlamasy boıynsha quramynda Ásem Orynbaı, Zoıa Kravchenko jáne Olga Panarına óner kórsetetin bizdiń komanda jalpy 350 upaı jınap, jarys rekordyn jańartty.
Al jekeleı saıysta Ásem Orynbaı qola júldege qol jetkizdi.
Stend atýdyń skıd baǵdarlamasynda altyn ıelengen úsheýdiń biri – Olga Panarına. Ol – 53 jasta. Azıadanyń sý jańa chempıony men rekordshysynyń otbasynda nemeresi ósip keledi. Mergendik jas talǵamaıtynyn Panarına kezekti márte dáleldedi.
– Birinshiden, kóp jattyǵamyn. Ekinshiden, sportshylar qartaımaıdy. Nysana kózdeý – bul meniń ómirlik isim. Sol sebepti bar kúsh-jigerimdi jumsaımyn. Komandalastaryma da alǵys aıtqym keledi. Menen keńes suraǵandarǵa, árqashan kómektesýge tyrysamyn. Ujymymyz óte tatý. Menińshe, bul jeńis – osy komandalyq rýhtyń jemisi. Bul medalimdi ata-anama arnaǵym keledi. Olar árqashan menimen birge, – dedi O.Panarına.
Stend atýda (Skid-mih) Edýard Eshenko men Ásem Orynbaı el qorjynyna kezekti altyn medal qosty. Atalǵan básekede alǵashynda 8 qurama baq synady. Jerlesterimiz birinshi orynmen irikteýden súrinbeı ótti. Ekinshi kezeńde 6 qurama fınaldyq joldamany sarapqa saldy. Bul synda otandastarymyz ekinshi orynǵa turaqtady. Al sheshýshi kezeńde Kýveıt mergenderimen ózara jeńimpazdy anyqtaýǵa kiristi. Eki quramaǵa da altyn aýadaı qajet edi. Sebebi kýveıttikterdiń qorjynynda buǵan deıin 1 altyn, 1 qola medal bolsa, al bizde 2 altyn, 3 kúmis, 13 qola bar-tuǵyn. Namysqa tyrysqan jerlesterimiz bas-aıaǵy jarty saǵattyń ishinde qarsylastarynan 5 upaıǵa asyp, Azıada chempıony atandy.
Shyny kerek, stend atý elimizde kenje damyǵan. Qazaqtar ádette balasyn fýtbol, kúres, boks sekildi sport túrlerine beredi ǵoı. Al Azıada sekildi alamandarda nysana kózdeý sportynan bir emes, birneshe medal jeńip alý múmkindigi bar. Osy Azııa oıyndarynda 20 medal jıyntyǵy sarapqa salyndy. Bul degenińiz – jeńil atletıkadan keıingi eń kóp medal úlestiretin sport túri. Onyń ústine, munda jasqa qaramaıdy. Bizdiń Olga Panarına 53 jasynda Azııa oıyndarynyń chempıony atansa, kúmis júldeger kýveıttik sportshynyń jasy 60-ta. Sondyqtan da osy sport túrin elimizdiń ár qalasynda damytý kerek degen oı keldi. Áıtpese, quramada Ásem Orynbaıdan basqa birde-bir qazaq sportshysy joq.
Jarystyń sońǵy kúngi nátıjesi
Azııa oıyndarynyń sońǵy eki kúninde el qorjynyna 2 altyn, 7 kúmis, 10 qola medal tústi. Al kórkem gımnastıkadan komandalyq saıysta Eljana Tanıeva, Erıka Jaılaýova men Mılana Parfılova, karateshiler Dıdar Ámiráli, Móldir Jańbyrbaı, Danııar Iýldashev, slalomda eskek esýden Anastasııa Ananeva, áıelder kúresinen baq synaǵan Jámılá Baqbergenova, djıý-djıtsý sheberi Galına Dývanova Azııa oıyndarynyń kúmis júldegeri atandy.
Azııa oıyndarynda baq synaǵan shahmattan Qazaqstan qyzdar quramasy alǵa Qytaı men Úndistandy jiberip, úzdik úshtikti túıindedi. Al ártistik júzýden Iаsmın Tuıaqova men Arına Pýshkına, sý dobynan erler quramasy, slalomda eskek esýden Aleksandr Kýlıkov, karate básekesinde 61 kılo salmaq dárejesinde synǵa túsken Ásel Qanaı, djıý-djıtsýdan Marıan Ordabaeva, slalomda eskek esýden el namysyn qorǵaǵan 16 jastaǵy Ekaterına Taranseva, sheber júzýden el komandasy qola júldege qol jetkizdi.
Mergen qyz múlt ketken joq
Azııa oıyndarynda tapanshamen 10 metrge jyljymaly nysanany kózdeýde Zýhra Irnazarova qarsylastarynyń myqtylyǵyna qaramastan, jarysty óte senimdi bastady. Nátıjesinde, soltústikkoreıalyq qos sportshydan oq boıy ozyp, Azııa oıyndarynyń altynyn jeńip aldy.
Jarystan keıin bergen suhbatynda Zýhra top jarǵanyna óte qýanyshty ekenin jetkizdi.
– Barlyǵy oıdaǵydaı bolǵanyna rızamyn. Azııa oıyndaryna alǵash ret qatysyp otyrmyz. Sondyqtan qobaljymaı, dáldikpen nysanany kózdegenimizde, komandalyq saıysta birinshi oryn alatyn edik. Bul jarys qoı, dál qazir kim myqty bolsa, sol jeńiske jetedi. Alda áli talaı júlde alatynyma senimdimin, – degen Zýhra Azııa oıyndary aldynda qurama qyz-jigitteri kúnine eki retten daıyndyq júrgizgenin, jeke bapkerimen jeńiske jetý úshin baryn salǵanyn aıtty.
– Birinshi kezeńde tórtinshi oryn aldym. Ekinshi kezeń aldynda ózimdi qaırap, psıhologııalyq turǵyda daıyndalyp shyqtym. Sońǵy úshinshi kezeńde jeńimpaz atanatynyma senimdi boldym. Syńarym Fatıma kishkene aýyryńqyrap qaldy. Áıtpese onyń nátıjesi menen de asyp túser edi, – dedi Zýhra.
Eńsemizdi kótergen eskekshiler
Azııa oıyndary bastalar aldynda eskek esýshilerden tolaǵaı tabys kútkenimiz ras. Sebebi alǵashqy delegasııany Almatydan Hanchjoýǵa shyǵaryp salý kezinde mamandar boks, dzıýdo, kúres, nysana kózdeý, sonymen qatar kanoede eskek esýden birneshe altyn medal alýdan úmitti ekenin aıtqan edi. Mamandardyń boljamy dál keldi. Árıne, eskek esýshiler topyrlatyp birneshe altyn medal almasa da, kóńil kónshiterlik nátıje kórsetti.
Kanoede eskek esýden Sergeı Emelıanov pen Tımýr Haıdarov bastaǵan eskekshilerdiń altyn alatynyna barlyǵymyz senimdi boldyq. Senim aqtaldy da.
S.Emelıanov pen T.Haıdarov bastaǵan jup 500 metrlik qashyqtyqta qarsylastarynan anaǵurlym ozyp, Azııa oıyndarynyń altyn júldesine ıe boldy. Sportshylarymyz jeńisten keıin tilshilermen tildesip, aldaǵy josparlary týraly aıtty.
– Buǵan deıin eki Azııa oıyndarynda kúmis júlde aldym. Úshinshi Azııa oıyndary men úshin sátti bastaldy. Alǵashqy qashyqtyqta altyn aldyq. Kóńil kúı óte keremet! Márege birinshi bolyp jetý erekshe sezim eken. Elimizge altyn medal ákelgenimizge qýanyshtymyz. Bári oılaǵandaı ótti. Biz óz jumysymyzdy atqardyq. Nátıjesinde, qashyqtyqty senimdi túrde ıgerip, birinshi keldik, – dedi Sergeı Emelıanov.
Jelden júırik veloshabandozdar
Tasjoldaǵy velojarysta synǵa túsken ulttyq quramanyń kóshbasshysy Alekseı Lýsenko úzdik nátıje kórsetip (48:05:75), Azıadanyń altyn medalin enshiledi. Otandasymyz osylaısha Azııa oıyndarynyń tórt dúrkin jeńimpazy atandy.
Evgenıı Fedorov ta velosporttan toptyq jarysta máre syzyǵyn birinshi bolyp kesip, Azııa oıyndarynyń altyn júldesine ıe boldy. 207,7 shaqyrymǵa sozylǵan toptyq saıysta ekinshi bolyp máre syzyǵyn taǵy bir otandasymyz Alekseı Lýsenko kesip ótti. Aıta keteıik, buǵan deıin Azııa oıyndarynyń 4 dúrkin chempıony bolǵan Alekseı Lýsenko márege jaqyn qalǵanda óziniń áriptesi Evgenıı Fedorovke jolyn berip, márttik tanytty. E.Fedorov 2018 jyly jasóspirimder arasynda Olımpıada chempıony, 2019 jyly ǵana eresekter qataryna qosyldy. Ol 23 jasqa deıingiler arasynda álem chempıony, 4 dúrkin Azııa jeńimpazy.
Batyrbekov er eken
Djıý-djıtsýdan birneshe elde ótken halyqaralyq týrnırde top jarǵan Nurjan Batyrbekov quramaǵa taǵy bir altyn medaldi alyp berdi. Nurjan Azııa oıyndaryndaǵy fınaldyq saıysta eki dúrkin Azııa chempıonyn jeńip, jankúıerlerdi bir qýantyp tastady. Álem chempıonatynyń qola júldegeri N.Batyrbekov (69 kg) jarys barysynda Osama Kandıldi – 9:0, Ramshed Abdýllaevty – 7:0, Seonghýeon Jýdi 5:2 esebimen jeńdi. Fınaldyq aıqasta Mohamed Alsývaıdıden 4:2 esebimen aılasyn asyrdy.
Túıin. Qaı sportshy bolsyn jarysqa halqynyń abyroıyn asqaqtatyp, eliniń ánuranyn shyrqatyp, baıraǵyn jelbiretsem dep baratyny belgili. Bizdiń de sportshylarymyz Hanchjoýǵa osyndaı maqsatpen attanǵan. Alaıda bireýiniń baby kelmese, endi birine qazylar qııanat jasaǵanyn da kóz kórdi. Qalaı bolǵanda da sportshylarymyz bar kúsh-jigerin jumsaǵany anyq. Sol sebepti elimizdiń ánuranyn shyrqatqandarmen birge jeńis tuǵyryna kóterilip, kók týymyzdy jelbiretkenderdiń barlyǵyn maqtanysh etemiz.
