Foto: primeminister.kz
Úkimet basshysy holdıngtiń respýblıka aýmaǵyndaǵy jobalarǵa ınvestısııa salý nıetin joǵary baǵalaıtynyn aıtty. Á.Smaıylov búginde elimizde túrik kapıtalynyń qatysýymen 4 myńnan astam kompanııa jumys isteıtinin jetkizdi. Atap aıtqanda, taý-ken metallýrgııa kesheni, ınfraqurylym, tamaq ónerkásibi jáne farmasevtıka sııaqty salalarda jobalar iske qosyldy. «Eki el arasyndaǵy qalyptasqan ornyqty senim deńgeıi men yntymaqtastyqqa degen ortaq umtylys bizge jańa perspektıvalar ashýǵa múmkindik beredi», dedi Premer-mınıstr.
«Úkimet basshysy atap ótkendeı, búginde elimizde ınvestorlar úshin barlyq qajetti jaǵdaılar jasalǵan jáne zamanaýı ınstıtýsıonaldyq orta qalyptasqan. Atap aıtqanda, basym salalardaǵy jobalardy júzege asyrý aıasynda kedendik tólemderden bosatý, túrli salyq jeńildikteri, salyq zańnamasynyń turaqtylyǵyna kepildikter jáne t.b. qarastyrylǵan. Ahmet Eren tıisti ınvestısııalyq sheshimder qabyldaý úshin holdıngtiń Qazaqstanda áleýetti jobalardy zerdeleýge daıyn ekenin aıtty», delingen habarlamada.
«Biz óndiristi keńeıtemiz jáne ınvestısııalyq jańa múmkindikterdi qarastyryp jatyrmyz. Bul qaǵaz óndirisi, energetıka jáne toqyma ónerkásibi sııaqty salalar bolýy múmkin. Biz taý-ken metallýrgııa keshenine de ınvestısııa salýǵa daıynbyz. Bul rette, jumystyń joǵary sapasyna qol jetkizýge múmkindik beretin tehnologııalar bar. Sondyqtan ınvestısııa máselelerin birlesip qarastyrǵymyz keledi», dedi Eren Holding basshysy.
Kezdesýde Qazaqstan aýmaǵynda áleýetti ınvestısııalyq jobalar pýlyn pysyqtaý jáne barlyq ózekti máseleler boıynsha belsendi dıalogty qoldaý týraly kelisim jasaldy.
