Kazakhstan Growth Forum sharasynyń generatıvti jasandy zerde kómegimen bıznesti transformasııalaý taqyrybyndaǵy paneldik sessııasynda otandyq bıznesmen, AITAS holdınginiń negizin qalaýshy Serik Tolyqpaev agroóndiristik keshende jasandy zerdeni jáne sıfrlandyrýdy qoldanýdyń artyqshylyqtary, sondaı-aq bıznesti basqarý júıesindegi ınnovasııalyq tásilder týraly keńinen áńgimelep berdi. Suhbat barysynda spıker jasandy zerdeniń endigi jerde zamanaýı agrarlyq kásiporyndarda keńinen qoldanylatynyn atap ótti.
«Agrosektordaǵy jasandy zerde Machine Learning (Mashınany oqytý) jáne Somputer vision (Kompıýter kózi) baǵyttarynda jumys isteıdi. Sońǵy eki jyl ishinde jasandy zerdeni ósimdik sharýashylyǵynda belsendi paıdalanyp júrmiz. Osynyń arqasynda salanyń tabysy 10-15%-ǵa artty», dep málimdedi S.Tolyqpaev.
AITAS mamandary agroóndiristik keshende IT salasynda qoldanylatyn sıfrlyq sheshimderdiń kópshiligin utymdy júzege asyrýǵa bolady dep biledi. Mashınany oqytý sharýalarǵa egin túsimi men aýa raıyn boljaýǵa kómektesedi. Kompıýter kózi arnaıy baǵdarlamalanǵan dron arqyly paıdaly ósimdikti jáne aramshópti tanýǵa, olardyń kólemin anyqtaýǵa jol ashady. Sonymen qatar jasandy zerde aýyl sharýashylyǵy alqaptarynda naqty jer óńdeýdi damytýǵa úles qosa alady. Máselen, mundaı tehnologııanyń kómegimen holdıng sharýalary jerdiń qunarlylyǵy turǵysynan alqapty birneshe bólikke bólip, egindi soǵan oraılastyryp salady. Iаǵnı qunarlylyǵy joǵary aımaqtarǵa otyrǵyzylatyn tuqym kólemi joǵaryraq bolady, bul óz kezeginde barynsha tıimdi ónim alýǵa septigin tıgizedi.
Áńgime barysynda S.Tolyqpaev IT-salasyna, startaptardy qoldaýǵa jáne uıym qyzmetin basqarý júıesine arnalǵan jańa tásilderdi paıdalanýǵa ınvestısııa salýdyń mańyzdy ekenin aıtyp ótti. Onyń pikirinshe, AITAS holdıngi túrli ınnovasııaǵa, jekeleı alǵanda naryqtaǵy qundylyqtar qatynasyna ózgeris ákelýi múmkin aıryqsha jobalarǵa qoldaý bildiredi.
Sondaı-aq agroóndiristik uıymnyń negizin qalaýshy AITAS transformasııasy týraly da aıtyp ótti: «Kompanııa erekshe ýaqytty bastan ótkerip jatyr. Basqarý júıesin basshylyqqa ala otyryp, qazirgi jáne bolashaq bıznesimizdi «Run», «Change» jáne «Disrupt» atty úsh baǵytqa bólip tastadyq. Bulardyń árqaısysy nazar aýdarýǵa turarlyq model dep oılaımyn. «Run» – belgili bir qarqynmen damyp otyrýǵa múmkindik beretin, alaıda naryq shekarasynan shyǵa almaıtyn bıznes. «Change» – naryq áleýetin arttyra alatyn odaqtarmen, strategtermen birlesý. «Disrupt» – startaptar, jańa bıznes-modelder, bul baǵyttyń aıasynda búkil álem boıynsha «dızrapt» tehnologııalardy izdep, bolashaqta kúrt damytýǵa bolady-aý degen jobalarǵa qarajatymyzdyń 10%-yn baǵyttaımyz», deıdi S.Tolyqpaev.
Aıta ketelik, AITAS – Qazaqstandaǵy eń iri sıfrlyq agroónerkásiptik holdıng, onyń quramyna «Kýs&Vkýs» brendimen belgili О́skemen jáne Ortalyq Azııadaǵy eń iri Makınsk qus fabrıkalary, Almaty asyl tuqymdy qus reprodýktory, «AMP» brendimen et, delıkates, shujyq ónimderin óndirý, Aitas Foundation korporatıvtik qory sııaqty 15-ten astam kásiporyn kiredi. Holdıngte jemshóp jáne jemshóp komponentterimen qamtamasyz etý maqsatynda Shyǵys Qazaqstan jáne Soltústik Qazaqstan oblystaryndaǵy 35 myń gektardan astam aýmaqty alyp jatqan birneshe sharýashylyq kiretin Aitas Agro bıznes-baǵyty jumys isteıdi.
