Foto: ashyq derekkóz
«Biz «Otandastar» qory uıymdastyrǵan osyndaı aýqymdy jıynǵa dástúrli túrde qatysyp turamyz. Búgingi forým burynǵydan ózgerek. Álemniń ár túkpirinen kelgen qandastarymyzdyń qýanyshtan júzi balbul jaınap tur. Olardyń eshbiri umytylmaı túgel jınalǵany qýantady», dedi Sáýle Taıkesheva.
Budan soń ol Reseı Federasııasyndaǵy «Qazaq tili» halyqaralyq ortalyǵynyń basty maqsatyna toqtalyp, atqarylyp jatqan jumystar týraly aıtyp berdi.
«Bizdiń ortalyqtyń basty maqsaty – qazaq tilin nasıhattaý. Jyl saıyn Batys Qazaqstan oblysy ákimdiginiń qoldaýymen «Ana tili álemi» atty oqýshylar lagerin uıymdastyryp turamyz. Ol lagerge Reseıdiń ár óńirinen qandastar keledi. Halyqaralyq deńgeıde ótken oqýshylar lageri Aqtóbe qalasynda ótkizildi. Balalardyń tilge, mádenıetke degen qyzyǵýshylyǵy artqanyn baıqadyq», dedi S. Taıkesheva.
Sondaı-aq ol Reseı jerindegi qandastar arasynda túrli dóńgelek ústelder, sheberlik synyptary, nasıhat jumystary júrgizilip turatynyn aıtty.
«Bes jyl buryn ólketanýshymen birlesip «Orynbordaǵy Ahmet Baıtursynovtyń izi» degen monografııa shyǵardyq. Sondaı-aq Orynborda «Alashtyń izimen» degen ekskýrsııalyq týr bar. Bul atqarylyp jatqan jumystar oń áserin berip jatyr. Qandastarymyzdyń genetıkalyq jady oıanyp jatyr deýge bolady. Sondaı-aq Altaı óńirinde 5-synypqa deıingi oqýshylarǵa arnap qazaq tili oqýlyǵy shyǵyp jatyr. Onyń bári Oqý-aǵartý mınıstrliginiń kelisimimen jasalady», dedi ol.
Onyń aıtýynsha, sońǵy 3-4 jylda Reseıdegi qandastardyń elge degen qyzyǵýshylyǵy arta túsken.
«Búgingi forýmda kóptegen kúrdeli máseleler kóterilip jatyr. «Otandastar qorynyń» arqasynda 3-4 jylda Reseıdiń ár óńiri oıanady. Jastardyń elge degen qyzyǵýshylyǵy artty. Bunyń barlyǵy árıne «Otandastar qory» jumysynyń jemisi. Bul qormen bir otbasydaı etene jumys istep jatyrmyz. Reseıdiń ár túkpirinen eshkim umytylmaı kelip jatyr. Bul da bir jaqsy nátıje», dedi Sáýle Sovhozqyzy.
