Foto: ashyq derekkóz
«Bul – halqymyz úshin aıryqsha máni bar basqosý. Qazaqta «Kelisip pishken ton kelte bolmas» degen sóz bar. Ata-babamyz qashanda eldik máselelerdi alqaly jıynda aqyldasyp sheshken. Osy oraıda sheteldegi qazaqtarmen jan-jaqty baılanysty nyǵaıtý, ulttyq qundylyqtardy dáripteý jáne basqa da ózekti máselelerdi ózderińizben birge talqylaýdyń mańyzy zor. Qaı memleketti meken etse de, qazaqtyń bir ǵana tarıhı Otany bar, ol – Qazaqstan. Sondyqtan biz shetelde turatyn baýyrlarymyzdy qoldaýǵa qashanda basa mán beremiz. Olardyń Atajurtqa qonys aýdarýyna barlyq jaǵdaı jasalǵan. Qazaqstan azamattyǵyn jáne qandas mártebesin alý tártibi jeńildetildi. Sheteldegi qazaq kásipkerleri úshin «Ata joly» kartasy engizildi. Basqa da mańyzdy jumystar atqarylýda. Qandastarmen qarym-qatynasty damyta túsýge baǵyttalǵan osyndaı sharalar jalǵasa beredi», dedi Prezıdent.
Qasym-Jomart Toqaev jıynǵa álemniń ár túkpirinen arnaıy kelgen qandastarymyz ben mártebeli meımandarǵa alǵys aıtyp, atalǵan basqosýda alystaǵy aǵaıynmen baılanysty nyǵaıtýǵa septigin tıgizetin salıqaly oı, salmaqty pikirler aıtylatynyna senim bildirdi.
Sondaı-aq Memleket basshysy jıyn qatysýshylaryna zor densaýlyq, baq-bereke tiledi.
