«Ashyq ákimdikke» óz máselesi men ótinishin aıtýǵa keletinder kóp. Endi «ashyq ákimdik» tek qyzmettik emes, mádenı-rýhanı baǵyttaǵy jumystardy júrgizýge de laıyqtalǵan oryn bolady. Bastamany júzege asyrǵan – «Farab» kitaphanasynyń ujymy. «Ashyq ákimdikke» ótinish aıtyp kelýshiler men sol aýmaqtaǵy turǵyndar turaqty túrde qalaǵan kitabyn oqýǵa múmkindik aldy. Sondaı-aq qandaı kitap qajet ekenin jazyp, qaldyra alady. Kitap buryshtary aýdan, qala ákimdikterinde de ashylǵan. Jyljymaly kitap pýnkti eki bólimnen turady. Birinshi baǵyt «Ashyq qor» dep atalady. Al sonyń janyndaǵy «Negizgi qor» bólmesinde oqyrmannyń kitap oqýy úshin jaǵdaı jasalǵan. «Farab» ámbebap ǵylymı kitaphanasynyń dırektory Janat Shardarbekovanyń aıtýyna qaraǵanda, oblystaǵy «Ashyq ákimdik» keńsesiniń ishinen ashylǵan kitap sóresinde qazirgi tańda myńǵa jýyq kitap qory jasaqtalǵan. Onyń ishinde túrli baǵytta, atap aıtqanda, motıvasııalyq, kórkem ádebıet, psıhologııalyq, tarıh, dintaný taqyrybyndaǵy kitaptar jáne merzimdi basylymdar bar. Sonymen qatar oqyrman suranysyna qaraı qajetti kitaptardy oblystyq kitaphanadan qysqa merzimde jetkizý múmkindigi qarastyrylǵan.
Osyndaı ıgi bastamalardy iske asyrý arqyly oqyrman qataryn kóbeıte túsken Túrkistan oblystyq «Farab» ámbebap ǵylymı kitaphanasy jýyrda Mádenıet jáne aqparat mınıstrliginiń qoldaýymen Ulttyq akademııalyq kitaphanasy uıymdastyrǵan «Kitap Time» jalpy respýblıkalyq kitap festıvali aıasynda is-sharalardy joǵary deńgeıde ótkizgeni úshin úzdik dep tanyldy. Aqtaý qalasynda Qazaqstandyq kitaphanalyq odaqtyń kóshpeli jumys otyrysy jáne Q.Sydıyquly atyndaǵy Mańǵystaý oblystyq ámbebap kitaphanasynyń 50 jyldyǵyna arnalǵan «Kitaphana isin damytýdaǵy zamanaýı álemdik úderister» taqyrybynda respýblıkalyq konferensııa ótken bolatyn. Konferensııa barysynda Ulttyq akademııalyq kitaphanasynyń dırektory Ǵazıza Qudaıbergenqyzy «Farab» ámbebap ǵylymı kitaphanasynyń dırektory Janat Shardarbekovaǵa úzdik kitaphana sertıfıkatyn tabys etti. Aıta keteıik, kitaphana dırektory byltyr «Jyl kitaphanashysy-2022» atanǵan bolatyn.
Túrkistan oblysy
