Bul týrnırdiń ereksheligi qatysýshylar jas ereksheligine qaraı bólinbeıdi eken. Irikteýden ótken kez kelgen oıynshy týrnırde baǵyn synaıdy.
– Shahmat – qarapaıym ǵana sport túri emes, bul ulttyń zııatkerlik deńgeıin kóteretin úlken qural. Keıingi jyldary shahmatshylarymyz halyqaralyq deńgeıde úlken jetistikterge jetip júr. Degenmen biz elimizdiń alys aýdandary men óńirlerine de kóńil bólgimiz keledi. Osy qozǵalys jolynda qoǵam men bılik ókilderiniń atsalysqanyn qalaımyz, – deıdi respýblıkalyq shahmat federasııasynyń vıse-prezıdenti Aleksandr Babenko.
Jezqazǵanda ótken týrnırde 8-synyp oqýshysy Sálimjan Saqbaev – 3-oryn, qutqarý salasynyń qyzmetkeri Almas Sarmurzaev 2-oryndy ıelendi. Al 10 jasar Maqsat Baısalbekov bárinen de ozyq shyqty. Bulardyń úsheýi de Túrkistanda ótetin grand-fınalǵa joldama aldy.
– Keıingi shahmat baıqaýlaryna Ulytaý óńirinen 100-den asa oıynshy qatysyp júr. Ishinde 5-6 jattyqtyrýshy bar. Oblys retinde endi-endi damyp kele jatqandyqtan, áli de aramyzdan jańa shahmatshylar men respýblıkalyq, halyqaralyq deńgeıde jarqyraıtyn juldyzdar shyǵady. «Shahmat kerýeni» jobasynyń ólkemizge kelýi jańa serpin beredi dep senemin, – deıdi federasııanyń Ulytaý oblysy boıynsha atqarýshy dırektory Baǵdat Baısalbekov.
Saltanatty is-shara barysynda respýblıkalyq shahmat federasııasynyń oblystyq fılıaly qurylyp, onyń tóraǵasy bolyp Ulytaý oblysy ákiminiń orynbasary Dastan Ryspekov saılandy.
Ulytaý oblysy
