Sýretti túsirgen – Erlan OMAR, «EQ»
Basqosýda sala ókilderi memlekettik qyzmet salasyndaǵy negizgi jetistikter, onyń ishinde zańnamalyq bastamalardy iske asyrý, memlekettik qyzmetterdiń sapasyn arttyrý baǵytyndaǵy is-sharalar jáne agenttikti tolyqqandy HR-ınstıtýtqa aınaldyrý josparlarymen bólisti.
Prezıdent Qasym-Jomart Toqaevtyń memlekettik qyzmetti jańǵyrtý tapsyrmasyn júzege asyrý aıasynda 4 zań qabyldandy. Qujatqa sáıkes birqatar táýeldi akt de ázirlendi. Bul jumystardyń basty maqsaty – salany odan ári jetildirý, zaman talabyna saı túbegeıli jańǵyrtý.
– Memlekettik apparatty bıýrokratııalardan aryltý boıynsha júrgizilgen monıtorıng jáne taldaý nátıjeleri boıynsha agenttik 373 usynys ázirledi. Onyń 91-i barlyq memlekettik apparattyń qyzmetine, qalǵan 282-si bilim berý, densaýlyq saqtaý, Eńbek jáne halyqty áleýmettik qorǵaý, qarjy, saýda jáne ıntegrasııa salalaryna qatysty. Bul usynystar adamdardyń qajettilikterine barynsha baǵdarlanǵan servıstik memlekettik apparatty qalyptastyrýǵa, sondaı-aq bıýrokratııalyq kedergilerdi azaıtýǵa baǵyttalǵan.
Máselen, 2023 jyly 1 shildeden bastap oblystyq jáne aýdandyq mańyzy bar qalalardaǵy jer komıssııasy ınstıtýty alynyp tastaldy, bul ókilettikteri bar adamdarǵa óz betinshe sheshim qabyldaýǵa, tıisinshe olardyń jaýapkershiligin jekelendirýge múmkindik berdi, dedi Memlekettik qyzmet isteri agenttigi tóraǵasy Darhan Jazyqbaı.
BAQ jáne qoǵam ókilderi úshin uıymdastyrylǵan baspasóz týrynda memlekettik qyzmetti meılinshe ońtaılandyrý tek quqyqtyq-normatıvtik qujattarǵa ózgertýler engizýmen shektelmeıtini aıtyldy. Iаǵnı memlekettik qyzmetshilerge qoıylatyn talaptar da kúsheıtiledi. Sáıkesinshe, shendilerdiń kásibı-tulǵalyq bolmysy jetiledi.
– Agenttik qyzmetiniń basty baǵyttarynyń biri – halyqqa sapaly memlekettik qyzmet kórsetý. Kórsetiletin qyzmetti alýshylardyń quqyqtaryn qorǵaýǵa jáne qalpyna keltirýge erekshe nazar aýdarylady. Jyl basynan beri agenttik qyzmet alýshylardyń 629 ótinishin qarady. Qorytyndysy boıynsha 181 azamattyń dálelderi rastalyp, quqyqtary qalpyna keltirildi. Eń kóp shaǵymdar «Azamattarǵa arnalǵan úkimet» memlekettik korporasııasy» KEAQ jáne jergilikti atqarýshy organdardyń jer qatynastary, sáýlet, turǵyn úı-kommýnaldyq sharýashylyq, jumyspen qamtý jáne áleýmettik qamsyzdandyrý salalarynyń qyzmetkerleriniń áreketterine qatysty bolyp otyr. Budan basqa, kórsetiletin qyzmetti berýshilerdiń 577 qyzmetkeri tártiptik, al 298 memlekettik organdardyń basshylary ákimshilik jaýapkershilikke tartyldy. Memlekettik aıyppul túrinde 22 mln teńgeden asa aıyppul óndirildi. Qoǵamdyq baqylaý aıasynda memlekettik qyzmet kórsetetin 882 uıymǵa bardyq. 732 zań buzýshylyq anyqtalyp, 852 usynys engizildi. Agenttik memlekettik qyzmet kórsetý rásimderin jetildirý baǵytynda ótken jyly – 560, bıyl 250 usynys ázirledi, – dedi agenttik tóraǵasynyń orynbasary Salaýat Múksimov.
Baspasóz týrynda memlekettik qyzmetke kirý úderisin jeńildetý máselesi de sóz boldy. Memlekettik grant esebinen joǵary oqý oryndaryn úzdik bitirgen, GPA kemi 3,33-ten joǵary túlekterdi aýdandyq jáne aýyldyq deńgeılerde tómengi laýazymdarǵa konkýrstan tys taǵaıyndaý múmkindigi engizilgen. Búginde bul ıgilikti 59 jas kórip úlgergen.
– Agenttiktiń kelisimi boıynsha konkýrssyz «B» korpýsynyń basshy laýazymdaryna tikeleı taǵaıyndaý jeke sektordan bilikti jáne salalyq tájirıbesi bar mamandardy tartýǵa múmkindik beredi. Zań qoldanysqa engizilgennen keıin 188 taǵaıyndaý kelisilmek. Sondaı-aq oqý barysynda joǵary kórsetkishterge qol jetkizgen Memlekettik basqarý akademııasynyń túlekterin óńirlik organdarǵa konkýrssyz tikeleı taǵaıyndaý da memlekettik qyzmetshilerdi ózderiniń kásibı damýyna nazar aýdarýǵa yntalandyrady. Qazirgi ýaqytta akademııa úzdik túlekteriniń ishinen konkýrstyq irikteýsiz 8 taǵaıyndaý júzege asyryldy, – dedi Prezıdent janyndaǵy MBA rektory Erlan Ábil.
Bıyl birinshi naýryzdan bastap bes memlekettik organda «E-qyzmet» júıesiniń syrtqy portaly kómegimen irikteýdiń jańa júıesi iske qosyldy. Qanatqaqty jobada adamı faktordy boldyrmaý úshin memlekettik laýazymǵa úmitkerlerdiń derekteri ID nómirler berý arqyly júrgiziledi. Zańnamany bilý, jeke quzyretterin baǵalaý jáne mátindik-sandyq testileý tolyǵymen avtomattandyrylǵan.
– Júıe nátıjelerdi shyǵaryp, qatysýshylarǵa habarlamalar jiberedi jáne qorytyndy kezeńge – suhbatqa qatysý úshin eń úzdik úsh úmitkerdi tańdaıdy. Barlyq kezeńniń qorytyndysy boıynsha eń joǵary ball jınaǵan úmitker jeńimpaz bolyp tanylady. Konkýrstarǵa qatysýdyń onlaın kezeńderi úshin proktorıng júıesi qoldanylady. Úmitkerler tarapynan testileý erejeleriniń kez kelgen buzýshylyqtary: qashyqtan qol jetkizý baǵdarlamalaryn, qulaqqaptardy paıdalaný, bógde adamdardyń kómegine júginý jaǵdaılary tirkeledi jáne úmitkerler shettetiledi. Búginde memlekettik qyzmettiń «B» korpýsynyń bos laýazymdaryna ornalasýǵa 767 konkýrs ótkizildi. Olarǵa 4 489 úmitker qatysýǵa nıet bildirip, onyń 378-i jeńimpaz bolyp tanyldy, dedi MQIA tóraǵasynyń orynbasary Aınur Serǵazıeva.
Aıta keterligi, shendilerdiń kásibı, otbasylyq jáne jeke qajettilikterin eskere otyryp, qolaıly jumys kestesi de engizilgen. Qazir 738 memlekettik qyzmetshi qashyqtan jumys isteý jáne basqa da múmkindikterdi paıdalanyp júr.
