Foto: ashyq derekkóz
Onyń aıtýynsha, temirjol salasy qyzmetkerleriniń ómirin jaqsartý salasynda kóptegen másele bar. Senator elimizde salany damytý úshin tipti jańa mınıstrlik qurylǵanyn atap ótti. Alaıda Shıpovskıh atap ótkendeı, memlekettik organ temirjolshylardyń negizgi máselelerin, onyń ishinde jalaqynyń tómendigin, turǵyn úıdiń joqtyǵyn jáne zeınetke shyǵý jasyn tómendetý máselesin áli sheshken joq.
Depýtat Kólik mınıstrliginiń aqparaty boıynsha eń tómengi sanattaǵy «baılanys jáne dabyl» mamandarynyń jalaqysy Aqtóbede 382 myń teńgeni, Qyzylordada 354 myń teńgeni, al eń tómengi sanattaǵy «jolshynyń» jalaqysy Abaı oblysynda 280 myń teńgeni jáne Pavlodar oblysynda 280 myń teńgeni quraıtyndyǵyna nazar aýdardy. Biraq bul, senator atap ótkendeı, shyndyqqa sáıkes kelmeıdi.
«О́ńirlerdegi temirjolshylardan alǵan málimetterge súıensek, eń tómengi sanattaǵy «baılanys jáne belgi berý» mamandarynyń qolǵa alatyn jalaqysy Aqtóbede jobamen 200 myń teńge, Qyzylordada 180 myń teńge, dál solaı eń tómengi sanattaǵy «jol jóndeýshiniń» jalaqysy Abaı oblysynda 160 myń teńge, Pavlodar oblysynda 205 myń teńgeni quraıdy. Mınıstrlik pen óńirlerdegi temirjolshylardan alǵan aqparat ekeýi eki túrli. Biz qaısysyna senemiz? Árıne, halyqtyn aqparatyna senemiz», dedi senator.
Senator osy derekterdi alǵa tarta otyryp, temirjolshylardyń máselelerin tolyǵymen sheshe alatyn birqatar sheshim usyndy. Qazir bul salada 140 myńǵa jýyq adam jumys isteıdi, demek onyń ekonomıkalyq áseri de úlken bolady.
«Birinshiden, «Qazaqstan temir joly» ulttyq kompanııasynyń jyldyq tabysyn, memleket tarapynan beriletin sýbsıdııany jáne ınflıasııany eskere otyryp, temir jol salasynyń qarapaıym jumysshylarynyń jalaqysyn kóterý kerek. Ekinshiden, temir jol salasyndaǵy qarapaıym jumysshylarǵa korparatıvtik kelisim nemese basqasha tetikterdi qarastyra otyryp, 55 nemese 57 jastan zeınetke shyǵarýdy qamtamasyz etý kerek. Úshinshiden, temir jol qyzmetkerlerine arnalǵan turǵyn úı baǵdarlamasy ázirlenýi kerek, sondaı-aq baǵdarlamanyń tetikterin barlyq óńirlerge engizip, jergilikti atqarýshy organdarmen naqty algorıtmi jasalýy tıis», dedi senator.
