Atalǵan arnaýly kitaphana 1969 jyldan beri zaǵıptarǵa, kózi nashar kóretinder adamdarǵa, olardyń otbasylaryna jáne qalanyń sút zaýyty aýdanynda turatyn turǵyndarǵa qyzmet etip keledi.
«Kitaphanamyzdyń negizgi basymdyq baǵyty zaǵıp adamdarǵa qyzmet etý, árıne, jalpy adamdarǵa da qyzmet etemiz, kishkentaı baladan eńkeıgen qartqa deıin keledi. Kózi kórmeıtin azamattar aýdıokitaptardy tyńdaıdy nemese núkteli bederli braıl qarpindegi kitaptardy saýsaqtarynyń ushtarymen oqıdy. Izdegen kitaptarynyń aýdıonusqalary bolmasa, kitaptardy kitaphanashylar oqyp berip turamyz», deıdi Quralaı Serikqyzy.
Kitaphana dırektorynyń aıtýynsha, múmkindigi shekteýli jandardyń kóbi óte bilimdi. Barlyq sala boıynsha kitaptar bar, jastar kóbine motıvasııalyq-psıhologııalyq kitaptar oqysa, úlken kisiler tarıhı shyǵarmalar oqıdy.
«Núkteli bederli braıl qarpindegi qazaqsha kitaptardy sońǵy eki jylda ǵana alyp jatyrmyz, oǵan deıin qazaqsha ondaı kitaptar shyqqan emes. Sondyqtan N.Nazarbaev zııatkerlik mektebimen birlese otyryp, aýdıokitaptar shyǵaryp jatyrmyz, ıaǵnı zııatkerlik mektep oqýshylary kitaptardy mánerli daýyspen oqýy arqyly aýdıokitaptar ázirleý jumystaryn júrgizip jatyrmyz», dedi kitaphana basshysy.
Kuralaı Raıymbaevanyń sózinshe, atalǵan kitaphanada barlyǵy 36 myń dana kitap, onyń ishinde aýdıodybystalǵan 14 myń, núkteli bederli braıl qarpindegi 6 myń kitap bar.
