Maıra Rabatqyzy bul marapatty barsha ustaz qaýymyna kórsetilgen zor qurmet dep baǵalaıtynyn jetkizdi.
– Memleket tarapynan uzaq jylǵy eńbegimniń elenip jatqany júrek qalaýymmen tańdaǵan mamandyǵymnyń nátıjesi der edim. Osynaý jaýapkershiligi joǵary kásipti tańdaı otyryp, árbir ustaz sapaly bilim berýdi maqsat tutady. Keıingi ýaqytta pedagog mártebesi ósip, muǵalim mamandyǵynyń qurmeti artty. Pedagogıkalyq mamandyqtarǵa baratyn stýdentter qatary kóbeıdi. Sondyqtan el mektepterinde bilikti, bilimdi, óskeleń urpaqtyń keleshegine beıjaı qaramaıtyn muǵalimderdiń kóp bolǵanyn qalaımyn, – deıdi Maıra Rabatqyzy.
Maıra Rabatqyzy mektep partasynda matematıka pánine baýlyǵan ustazy Georgıı Popovtan kóp tálim alǵanyn jetkizdi. «Muǵalimimiz esep shyǵarýǵa selqostyqty múldem qalamaıtyn. Sondyqtan da bolar matematıka pánine qyzyǵýshylyǵymyz óte joǵary boldy. Osyndaı izdenimpaz, talapshyl muǵalimderimizdiń arqasynda mektepti altyn medalmen bitirip, Qyzdar pedagogıka ınstıtýtynyń Fızıka-matematıka fakýltetine oqýǵa tústim. Eńbek jolymdy «Aınabulaq» shaǵyn aýdanyndaǵy orys mektebinen bastadym», deıdi ol.
1997 jyly qazaq mektebine aýysyp, qaladaǵy kóptegen semınarǵa qatysa júrip, óz kásibinde jańa bir belesti baǵyndyrǵan Maıra Rabatqyzy alǵashqy kezde qazaq tilindegi termınderdi meńgerýdiń ońaı bolmaǵanyn eske aldy. Birte-birte ony da jyldam úırenip, aýdandyq semınarlardyń birinde elimizge esimi belgili ustaz Esmuqan Qanaǵatovtan qaladaǵy №161 mektepke jumysqa shaqyrtý alady. «Bilikti ustazdan shaqyrtý alý úlken mártebe boldy ári men ótkizgen semınardy joǵary baǵalaǵanyna sondaı qýanǵan edim. Keıinnen dırektor retinde osy mekteptegi biraz muǵalimdi UBT suraqtaryn qurastyratyn saraptamalarǵa, appelıasııaǵa kóp qatystyrdy. Nátıjesinde, bilmegenimdi úırenip, kóp shyńdalýyma týra keldi», dep atap ótti.
Qazirgi kezde UBT-ǵa daıyndaıtyn «Bolashaq» qosymsha bilim ortalyǵynda matematıkalyq bilimniń san taraýyna baýlyp júrgen ustaz balalardy bilimge qyzyqtyratyn qadamnyń kóp qajet ekenin alǵa tartty.
– Táýelsizdik jyldaryna deıingi balalarda bilimge qushtarlyq zor bolsa, qazirgi kezde bilimge degen kózqaras basqasha. Kóp balaǵa ata-analary qoldaý kórsetedi. Olar mamandyq tańdaýda da óz keńesterin bere otyryp, balasynyń sapaly bilim alýyna ınvestısııasyn aıap jatqan joq. Sonyń nátıjesinde balalardyń da bilimge zeıini artyp keledi. Jalpy bilim beretin mektepterde deńgeıi joǵary balalardyń deni qosymsha ortalyqtarda bilimin ushtap, UBT-da óte jaqsy nátıjege jetip jatyr. Al endi birinde ózdiginen izdený jaǵy basym. Mektepte pánge qyzyqpaǵanymen, qosymsha bilimniń nátıjesinde pándi jyldam meńgerip ketetin oqýshylar da bar, – deıdi Maıra Rabatqyzy.
Tájirıbeli ustaz atap ótkendeı, búginde oqýlyqtardyń sapasyna da mán berý ýaqyt kúttirmeıdi. Osy oraıda Maıra Rabatqyzy «Sapaly bilimniń ózegi oqýlyqta desek, keıbir oqýlyqta berilgen tapsyrma jaýabymen sáıkes kelmeı jatatyny qynjyltady. Sondyqtan oqýlyq avtorlary birneshe saraptamadan ótip, ozyq tájirıbelerge zer sala otyryp, tipten búgingi oqýlyqtarda kezdespeı jatatyn keńestik kezeńde jazylǵan tıimdi tásilderdi de qaperge alsa», degen pikirin alǵa tartty.
Keıingi ýaqytta balalarǵa qazirgi zamanǵa saı sapaly bilim berýde ózdiginen izdenip, respýblıka aımaqtarynan da onlaın sabaq alyp, bilgenin jetildirip jatatyn muǵalimder qatary kóbeıip keledi. Pedagogter sezinde de aıtylǵan máseleniń biri muǵalimderdiń biliktiligine qatysty boldy. Búginde sıfrlyq múmkindikterdiń jańashyl tásilderdi ıgerýdegi ıgiligi zor desek, bilim platformalarynyń muǵalimder úshin qoljetimdiligi, ásirese shalǵaı aýdandarda zamanaýı quraldardyń jetkiliksizdigi tolǵandyrady.
Osy oraıda Maıra Rabatqyzy: «Muǵalim – júrek qalaýymen tańdalatyn mamandyq. Árbir ustaz bala júregine jol taýyp, sapaly bilim berýmen qatar óz eline qyzmet etetin tulǵa qalyptastyrýdy maqsat etkende ǵana bul kásiptiń mártebesi artady. Ol úshin ulttyq qundylyqtardy qurmetteıtin, jańa zaman talaptaryna beıim, kásibı muǵalimder legi qalyptasýy qajet. Sonda ǵana biz jahandaný zamanyna beıim bilimdi jastar tárbıeleımiz», deıdi.
ALMATY
