Foto: Ashyq derekkóz
Táýelsizdiktiń bastaýy sanalatyn tarıhı qujatty qabyldaýda azattyq alý týraly másele kótergen halyq qalaýlaryn at ústinen aýdarýǵa umtylyp qarsy shyǵýshylar da tabyldy. Joǵarǵy Keńeske Kommýnıstik partııa men uıymdar hám saılaý okrýgterinen saılanǵan depýtattar syn ótinde turyp tarıhı qujatty qabyldady. 22 baptan turatyn 3 bettik egemendik týraly deklarasııany qabyldaǵan depýtattyń biri Ajarkúl Aldajarova 1990 jyldyń 25 qazanyndaǵy aıtýly oqıǵanyń mańyzy zor deıdi.
«Joǵarǵy Keńestiń HII shaqyrylym depýttary 1990 jyldan 1994 jylǵa deıin eńbek ettik. 1990 jyldyń 25 qazan kúni Egemendik týraly deklarasııany qabyldaǵanymyz kúni keshegideı esimizde. Ońaı bolǵan joq. Depýtattardyń da arqasynda amanat turdy. Túrli aıtys-tartys údedi, ár bapqa tereńdeı mán berip qaraý mańyzdy ekenin uǵyndyq. Ár sózdiń astaryna úńilip talqylaý mindeti júkteldi. Qazaq respýblıkasy degen uǵymǵa ózge ulttyń ókilderinen saılanǵan depýtattar da qarsy pikir aıtty. Memlekettik til qazaq tili bolýy tıis degen sóılemge de úrke qaraǵandar da, saıası astar izdegender de tabyldy. Olardyń túsiniginde qazaq tilin bilmeıtin ózge ult ókilderi erteń qalaı kún kóredi degen ýaıym basym edi. Egemendik týraly deklarasııa qabyldanǵanda, ásirese, jer ortasy jasyna jetken azamattarymyz kózine jas alyp qýandy.
Biz áıelder keńesi, balalardyń quqyǵyn qorǵaý komıtetine múshe bolǵandyqtan osy baǵyttaǵy birqatar máselelerge qatysty talqylaýda ózindik oı-pikirimizdi aıttyq. Egemendik týraly deklarasııany talqylaýda daýdy kúsheıtýge umtylǵan depýttardy Sultan Sartaev, Salyq Zımanov syndy zań salasynyń marǵasqa maıtalmandary naqty dálel-dáıekpen tıyp tastap otyrdy. Memlekettik rámizderimiz Tý, Eltańba, Ánurandy bekitýde de talqylaý tartyssyz ótken joq.
Almaty kóshesinde túrli uran kótergen toptardyń da áreketi kún sanap kúsheıdi. Jeltoqsan oqıǵasy úshin qýǵyndalǵan balalarynyń aqtalýyn suraǵan adamdar da sharasyzdyqtan kóshege shyqty. О́te qysyltaıań ólara shaqta turdyq. Joǵarǵy Keńestiń ǵımaratynan bizdi «Almaty» qonaqúıine deıin arnaıy kúzetpen jetkizetin. О́ıtkeni kóshede ár túrli jaıtqa baılanysty narazy toptardyń, ashtyq jarııalaǵan jandardyń da qatary arta túsken edi sol kezeńde. Mine osyndaı qysyltaıań shaqta elimizde taǵdyrsheshti sheshimder qabyldanyp, táýelsizdigimizge qol jetkizdik», deıdi A.Aldajarova.
