Foto: ashyq derekkóz
Qazaqstan rejısserleriniń kásibı sheberlikterin shyńdaý, shyǵarmashylyq tájirıbe almasý maqsatynda Mádenıet jáne aqparat mınıstrliginiń qoldaýymen ótkiziletin festıvalde kórermender otandyq 8 rejısserdiń týyndylarymen tanys bolady. Atap aıtqanda, Gúlnaz Balpeıisova, Meıram Habıbýllın, Anton Zaısev, Álibek О́mirbekuly, Shaǵýan Úmbetqalıev, Anna Soı, Árıdash Ospanbaeva jáne Shyńǵys Jaqypbaı syndy 35 jasqa deıin rejısserlerdiń tańdaýly qoıylymdary sahnalanady. Astana qalasy ákimdiginiń Jastar teatry, M.Áýezov atyndaǵy Qazaq ulttyq drama teatry, S.Seıfýllın atyndaǵy Qaraǵandy oblystyq akademııalyq drama teatry, taǵy basqa ujymdar úzdik qoıylymdaryn usynady. Festıvalde teatr ónerine eńbegi sińgen qaıratkerler Esmuqan Obaev, Nurqanat Jaqypbaı, Talǵat Temenov, Áýbákir Rahımov, Qýandyq Qasymov, Gúlsına Mırǵalıeva, Murat Ahmanov arnaıy shaqyrylǵan qonaqtar retinde boı kórsetedi.
Ulttyq jáne álemdik mádenıettiń qundylyqtaryn úılestire otyryp, jas rejısserlerdiń qalyptasý jolynda uıymdastyrylyp jatqan I Respýblıkalyq Jastar teatrlary festıvaliniń resmı ashylý saltanaty qarashanyń 1 juldyzynda, saǵat 17:00-de ótedi. Shara barysynda elimizde úzdik dep tanylǵan qoıylym rejısserleri marapattalady.
Qatysýshy rejısserlerdiń tól týyndylary ózindik erekshelikterine, sahnalyq ózgeshelikterine baılanysty Almaty qalasyndaǵy úsh teatr sahnasynda kópshilikke usynylady. Naqtylar bolsaq, 2 qarasha saǵat 15:00 – «Iа est», Totalnyı teatr teatrlyq kompanııasy, 18:30 – «Qaragóz» Ǵ.Músirepov teatry, 3 qarasha 11:00 – «Shyraq» Ǵ.Músirepov teatry, 18:30 – «Kassandra tańbasy» M.Áýezov teatrlarynyń sahnasynda qoıylady. Al, 4 qarasha 15:00 – «Rıchard III» Ǵ.Músirepov teatry, 18:00 – «Qyz Jibek» M.Áýezov teatrlarynda sahnalansa, festıvaldiń sońǵy 5 qarasha kúni 11:00 – «Qobylandy» Ǵ.Músirepov teatry, 18:30 – «Alǵashqy ustaz» Ǵ.Músirepov teatrynda kórermenmen qaýyshady. 6 qarasha kúni festıvaldiń resmı jabylýy bolady. Tuńǵysh ret ótkiziletin festıvaldiń deńgeıi joǵary, salmaǵy aýyr, mańyzdylyǵy joǵary bolatynyna senim mol.
ALMATY
