Foto: Ashyq derekkóz
«Ashyq Syllabus» jobasynyń maqsaty - medıakommýnıkasııa baǵytynda bilim beretin JOO stýdentteriniń álemdik standarttarǵa saı bilim alý úrdisine ádistemelik jáne aqparattyq qoldaý kórsetý, sondaı-aq salany odan ári damytýǵa qajet mańyzdy qadamdardy usyný. Jobany taldaýǵa elimizdegi alty joǵary oqý oryndaryndaǵy jýrnalıstıka mektebiniń sarapshylary: Esengúl Kápqyzy, Gúlmıra Áshirbekova, Ásel Qamza, Moldııar Ergebekov, Aınur Slamǵajy, Ashat Erkimbaı, Elnur Alımova jáne Qarlyǵa Mysaeva qatysty.
Sharanyń moderatory – joba jetekshisi Esengúl Kápqyzy bilim berý baǵdarlamalaryn taldaý qurylymy 3 kezeńnen turǵanyn atap ótti. «Ashyq Syllabus jobasy aıasyndaǵy zertteýlerdiń metodologııasyn ázirleý, otandyq jáne sheteldik bilim berý baǵdarlamalaryna taldaý jasap, áleýmettanýlyq zertteý júrgizý jáne eksperttik talqylaý ótkizý. Osy qadamdardyń negizinde sheteldik JOO-lardyń reıtıngi anyqtalyp, ádisnamasy zerttelip, zertteýdiń qorytyndy esebi daıyndaldy», dedi E.Kápqyzy.
Jıyn barysynda joǵary oqý oryndarynyń oqytýshy-professorlaryna, medıa zertteýshilerge otandyq jáne sheteldik bilim berý baǵdarlamalaryn taldaý nátıjeleri tanystyryldy. Sarapshylar 24 otandyq jáne 22 sheteldik JOO-nyń bilim berý baǵdarlamasyn saralap, salystyrmaly analız jasaǵandaryn aıtty. Joba aıasynda jýrnalıstıka baǵytynda bilim beretin otandyq joǵary oqý oryndarynyń oqytýshylary men stýdentteri arasynda keshendi áleýmettanýlyq zertteý jumysy júrgizilgen. Atap aıtsaq, 495 stýdenttiń arasynda saýalnama jáne 83 oqytýshynyń qatysýymen 10 fokýs-toptyq pikirtalas ótkizildi.
Joba nátıjesinde sandyq jáne sapalyq derekter jınaqtalyp, elimizdegi jýrnalıst mamandyǵyn oqytýdaǵy negizgi problemalar anyqtalyp, bilim berý baǵdarlamalarynyń úlgileri ázirlendi. Shara sońynda qatysýshylar joba týraly pikir bildirip, oqý oryndaryndaǵy teorııalyq jáne praktıkalyq pánderdiń úlesi, mindetti oqytylatyn kredıt sany, tańdaý komponentteri jáne pánder ataýynyń birizdi bolýy týraly birqatar usynys aıtty. Talqylaýdy Mádenıet jáne aqparat mınıstrligi men Qazaqstan qoǵamdyq damý ınstıtýtynyń «MediaLab» ortalyǵy uıymdastyrdy.
