Qazirgi Qazaq beıneleý ónerindegi órnegi erek, bederi anyq, aıtýly keskindemeshilerdiń biri Jumaqyn Qaırambaevtyń ulttyq naqyshqa baı týyndylary sıýjetiniń qarapaıymdylyǵymen, syrshyldyǵymen, shynaıylyǵymen birden baýrap áketedi. Ol asqaq taýlardy, saıyn dalany nemese ǵajaıyp qubylysqa toly tabıǵatty beınelese de óz boıyndaǵy adaldyǵy, tazalyǵy shyǵarmalarynan kórinip turady.
Kórmege sýretshiniń jumystary ǵana emes, sonymen birge onyń shákirtteriniń shyǵarmalary da qoıyldy. Ár týyndy – tereń fılosofııalyq mazmunymen, boıaýlarynyń qanyqtyǵymen, aq kenepke tógilip túsken kórkemdigimen jurtshylyqtyń qyzyǵýshylyǵyn týǵyzdy. Ásirese kórmede qazaq úshin kıeli sanalǵan jylqy beınesi keń qamtylǵan. Jumaqyn aǵamyz kóp jyldan beri Almatydaǵy T.Júrgenov atyndaǵy óner akademııasynyń professory. Onyń tálim-tárbıesin alyp, dárisin tyńdaǵan shákirtteriniń aldy álemge tanyldy. Sondyqtan bul kórme – sýretshiniń shákirtterimen birge qolǵa alǵan tórtinshi jobasy. «Perishte izi» degen ataýynyń ózi erekshe mánge ıe.
Mádenı is-sharanyń ashylýynda Eýrazııalyq dızaınerler odaǵynyń tóraǵasy, professor Ermek Asylhanov Astana halyqaralyq ýnıversıteti dızaın fakýltetiniń dekany Saıat Ybyraı sóz alyp, qylqalam sheberiniń shyǵarmashylyǵy týraly maǵynaly sóz qozǵap, mereıtoı ıesine izgi lebizderin bildirdi.
Parlament Májilisiniń depýtaty Janarbek Áshimjan qylqalam sheberiniń ulttyq beıneleý ónerinde orny bólek ekenine toqtaldy.
«Alataýdyń etegindegi alaqandaı aýylda týyp, qazaq beıneleý óneriniń bıigine kóterilgen tulǵany osy ónerdiń klassıgi dep aıtýǵa bolady. Onyń kartınalarynyń barlyǵy jaqsydan ónege alýǵa baǵyttalǵan pálsapalyq esselerden turady. Jumaqyn aǵa dástúrli óner muralaryn búgingi keskindeme múmkindikterimen qatar meńgergen sheber. Týyndylarynyń basym kópshiligi patrıottyq sezimdi oıatatyn tylsym kúshke ıe» dep, inilik iltıpatyn jetkizdi.
Jumaqyn Qaırambaev – Sankt-Peterbýrgtegi I.E.Repın atyndaǵy memlekettik akademııalyq keskindeme, músin jáne sáýlet ınstıtýtyn bitirgen. Osynda oqyp júrgende ataqty Ermıtaj mýzeıindegi Rembrandttyń ataqty «Danaıa» týyndysynyń kóshirmesin jasaǵan. Bul kóshirme sýret ınstıtýt qorynda qalyp, keıin Ermıtajda turǵan túpnusqa «Danaıaǵa» bireý silti shashyp zaqym keltirgende, kásibı qaıta jańǵyrtýshylar uly týyndyny qalpyna keltirý úshin ınstıtýttyń qorynda saqtaýly turǵan qazaq sýretshisiniń kóshirme eńbegin paıdalanǵan. Bul jaǵdaıdan oqyrmandardyń kópshiligi tanys bolmaýy múmkin. Osydan-aq Qaırambaevtyń eshkimge uqsamaıtyn bólek qoltańbasy bar ekenin tanısyz.
Is-shara sońynda kórnekti sýretshi shyǵarmashylyǵy týraly az-kem sóz qozǵap, kórmege kelgen qaýymǵa rızashylyǵyn bildirdi.
