Vıse-mınıstr ótken jyly qabyldanǵan qoldanystaǵy memlekettik qoldaý sharalarynyń aralyq qorytyndysyn jarııa etti. Atap aıtqanda, elimizdegi otbasylyq týrızmdi nasıhattaıtyn «Kids go free» baǵdarlamasy boıynsha bıylǵy 9 aıda 1 800 bala tegin ushyp, 800 otbasy el ishinde demalýǵa 80 mln teńge qarjysyn únemdegen.
E.Erkinbaev týrızmdi damytý úshin qajetti jańa is-sharalardy damytý jónindegi josparlaryn da ortaǵa saldy. Iаǵnı aldaǵy ýaqytta týrıstik «Kesh bek» engizý, ákimdikterge eldi mekenderden tys jerlerde ınfraqurylym qurý boıynsha quzyretter berý, týrıstik jobalardy jeńildikpen kredıtteý merzimderin 10 jylǵa deıin ulǵaıtý, týrıstik brendti osy jyldyń sońyna deıin bekitý, aýyl sharýashylyǵy maqsatyndaǵy jerlerde týrızm nysandaryn salýǵa ruqsat berý, gıdterdiń qyzmetin sıfrlandyrý jáne ornalastyrý oryndaryn jikteý júıesin jetildirý sııaqty birneshe jobany iske asyrý josparda bar ekenin jetkizdi.
«Týrıster sanynyń ósýi týrbıznes úshin jaqsy tabys kózi bolmaq. Jarty jyldyń qorytyndysy boıynsha qonaqúıler 100 mlrd teńge kóleminde paıda tapty. Bul ótken jylmen salystyrǵanda 30 mlrd-qa artyq. Týrbıznes damysa, salyq ta kóp túsedi. Jyl sońyna deıin týrızmnen el qazynasyna 400 mlrd teńge salyq túsedi dep josparlap otyrmyz», dedi vıse-mınıstr.
Spıker syrtqy naryqtarda Qazaqstannyń týrıstik áleýetin ilgeriletý boıynsha jańa marketıngtik jospar qurylyp jatqanyn málimdedi. Buǵan qosa ulttyq týrıstik brendti ázirleý týraly tapsyrma berilgenin, bul másele jan-jaqty qarastyrylyp jatqanyn jetkizdi.
«Birinshi – ınfraqurylym. Týrıstik oryndarda ınfraqurylym máselesi syn kótermeıdi. Logıstıka da tolyqtaı sheshilmegen. Ekinshi – sapaly týrıstik ónimderdiń azdyǵy. Sıfrlandyrý máselesi de bar. Úshinshi – sapaly mamandardy oqytý. Tórtinshisi – marketıng pen jarnama múmkindikteriniń azdyǵy», dedi E.Erkinbaev.
Onyń aıtýynsha, atalǵan máselelerdi júıeli sheshý úshin bıyl týrızmdi damytýdyń 2023-2029 jyldarǵa arnalǵan tujyrymdamasy qabyldanyp, maqsatty kórsetkishter bekitildi. Onyń ishinde 2029 jylǵa deıin ishki týrıster sanyn 9 mln-ǵa, sheteldik týrısterdi 4 mln-ǵa jetkizý kózdelgen. Týrızm salasyndaǵy mamandardy 1,6 ese, al ınvestısııa kólemin 2 ese ósirýdi qamtamasyz etý kerek.
Baspasóz jıyny sońynda vıse-mınıstr elimizdiń halyqaralyq arenada tanylýy boıynsha jetistikterin atap ótti. Taıaýda Almaty oblysyndaǵy Saty aýyly «Úzdik týrıstik aýyl» atalymy aıasynda halyqaralyq týrıstik uıym nusqasy boıynsha úzdik dep tanylǵanyn habarlady.
