Ata saqaly aýzyna túskende arsyz qylyq tanytqan 63 jastaǵy azamat – mektepke kúzetshisi. Jarty jyldan beri jumys isteıdi. Buǵan deıin teris qylyǵy baıqalmaǵan ol áreketin tolyq moıyndaǵan. Aldyna kelgen altynshy synyp oqýshysyn «óz nemerem eken dep oılap qaldym» dep túsindirgen.
– Kúzetshi mas bolǵan. Qyzym úıge kelgende oqıǵanyń qalaı bolǵanyn túgel baıandap berdi. Betin súıgizýden jıirkenetinin aıtty. Men balamnyń sol sátte qashyp shyqpaǵanda, qandaı jaǵdaıǵa tap bolaryn oılaýdan qorqamyn. Kúzetshi áreketi úshin jazalansyn, – dedi jábirlenýshiniń anasy.
– Kúzette bolǵan azamattyń týystary onyń maskúnemdikten emdelip júrgenin aıtty. Psıhotroptyq zattardy da qoldanady eken. Mundaı azamat qalaı balalardyń ortasynda qyzmet atqardy? Jumys kezinde de mas bolýyna nege jol berilgen? Jaýaptylar qaıda qarap otyr? – dedi ata-ana Lıýdmıla Lovenko.
Mektep ákimshiligi bul azamatty kúzet qyzmetine kompanııanyń ókili usynǵanyn aıtty. Demek oqý ornynyń basshylyǵy azǵynnyń alkogolge qumarlyǵynan beıhabar bolǵan. Jaǵdaı bolǵan kúni-aq mekememen aradaǵy kelisimshartty buzǵan.
– Pán muǵalimine, tárbıe isi jónindegi orynbasar men shaýashylyq bóliminiń basshysyna sógis berildi, – dedi № 160 JBB mekteptiń dırektory Gúlshat Amınova.
Mektep dırektory azamattyń masań kúıde bolǵanyn rastaıdy. Onyń aıtýynsha, oqýshy kúzetshiden muǵalim bergen tapsyrma qaǵazyn almaq bolǵan. Onyń ózinde de, úı jumysy bul qyzǵa tıesili emes. Ol tek onynshy synyptaǵy qurbysynyń ótinishin oryndaǵan.
– Almaty qalalyq Polısııa departamenti atalǵan derek boıynsha Alataý aýdandyq Polısııa basqarmasymen QR QK-niń 124-baby 1-bóligine sáıkes tergeý júrgizip jatqanyn habarlaıdy. Saraptamalar taǵaıyndaldy. Oqıǵanyń mán-jaıy anyqtalýda. Kúdikti ÁK-tiń 444-babynyń normalary boıynsha sottyń sheshimimen ákimshilik qamaýǵa alyndy, – dedi Almaty qalalyq Polısııa departamentiniń resmı ókili Saltanat Ázirbek.
Ata-analar «el aldynda arsyzdyǵyn tyımaǵan azamat ońashada qandaı áreketke barady?» dep alańdaıdy. Olar «oqýshylardyń qaýipsizdigin qamtamasyz etetin mamannyń ózi balalarǵa osylaı qaýip tóndirse, basqadan ne qaıyr?» dep keıip otyr.
Aıta keteıik, mektepte 1220 bala bilim alady.
