Sýretterdi túsirgen – Rýslan Qadyrov
Kópke málim, Bilim berýdi turaqty damytý qory byltyrdan bastap «Qazaqstan halqyna» qorymen jáne Nazarbaev zııatkerlik mektepterimen birlese «Aýyldyq aımaqtardaǵy tirek mektepterdiń áleýetin arttyrý» jobasyn júzege asyryp keledi. Bul bastamanyń negizgi maqsaty qalalyq jáne aýyldyq mektepter arasyndaǵy bilim berý sapasyndaǵy alshaqtyqty azaıtýǵa, pedagogterdiń kásibı sheberligin shyńdaýǵa baǵyttalǵan. Búginde óńirde osy jobaǵa 4 mektep kirip otyr. Onyń biri – Qoǵaly orta mektebi. Atalǵan qor mektepti damytýǵa joba aıasynda 250 mln teńge jumsaǵan. Bul qarajatqa 36 synyp qaıta jabdyqtaldy.
О́ńir ákiminiń baspasóz qyzmetiniń málimetinshe, berekeli bastama aıasynda Qarǵaly orta mektebiniń synyptaryndaǵy jıhaz jańartylyp, jóndeý jumystaryn júrgizýge kómek kórsetildi. Fızıka, hımııa, matematıka, bıologııa, geografııa, ınformatıka, jaratylystaný kabınetteri zamanaýı quraldarmen jabdyqtaldy. Interaktıvti panelder men zerthanalyq jabdyqtar ornatyldy. STEM zerthanasy men robottehnıka kabıneti synaqtarǵa kerekti shaǵyn gıdroponıka zerthanasymen, vırtýaldy shyndyq kabınetterimen jáne basqa da túrli quralmen, materıaldarmen jabdyqtalǵan. Informatıka kabıneti zamanaýı tehnologııalarǵa sáıkes tolyǵymen jańartylyp, kompıýterlik tehnıkalar qoıylǵan.
Qor ókilderi men demeýshiler mekteptiń jańartylý jaǵdaıymen tanysty. Atap aıtqanda, mektepke «Qazaqstan halqyna» qorynyń tóraǵasy Bolat Jámishev, Bilim berý salasyn turaqty damytý qory qamqorshylyq keńesiniń basshysy Kúlásh Shámshıdınova, sondaı-aq joba demeýshileri «Aitas.kz» holdınginiń ókilderi keldi.
B.Jámishevtiń aıtýynsha, joba aýyldaǵy bilim deńgeıin arttyrýǵa baǵyttalǵan: «Zańda «tirek mektep» uǵymy bar, biraq zań mundaı mekteptiń nemen aınalysýy kerektigin naqtylamaıdy. Bizdińshe, bul mektepterdi zamanaýı jabdyqtarmen jaraqtandyrýmen shektelmeýi kerek. Mundaı mektepter jaqyn mańdaǵy mektepter úshin quzyrettilik ortalyǵyna aınalýǵa tıis. Men bul mektepte jańa hımııa kabıneti qansha saǵat jumys isteıtinin surap bildim, ıaǵnı aptasyna eń kóp degende 8-10 saǵat qana jumys isteıdi. Qalǵan ýaqytta bos turmaýy úshin kórshi mektepterden de osynda oqýshylardy tartý kerek. Olar teorııany ózderinen úırensin, al praktıkalyq, zerthanalyq sabaqtarǵa osyndaı tirek mektepterge kelsin. Oǵan qosa onlaın sabaqtar da ótkizý kerek. Onlaın format – tek indet kezinde kerek format emes, sonymen qatar oqýshy úshin de, muǵalim úshin de sabaqtardyń kúndelikti formatyna aınalýǵa tıis. Bizdiń josparlarymyzdy júzege asyrýǵa osy turǵyda jınaqtalǵan oń tájirıbesi bar Nazarbaev zııatkerlik mektepteri kómektesedi», dedi B.Jámishov.
Turaqty bilim berýdi damytý qorynyń dırektory Danııar Toqtarbaevtyń aıtýynsha, qor 2019 jyldan bastap qalalyq jáne aýyldyq mektepterdiń bilim sapasy arasyndaǵy alshaqtyqty qysqartýǵa óz úlesin qosyp keledi. Jańa formatta bul joba ótken jyldan bastap iske qosyldy.
«Biz tirek mektepterdi úsh baǵytta damytamyz. Birinshisi – muǵalimderdiń biliktiligin arttyrý, tájirıbe almasý. Bul baǵytty Nazarbaev zııatkerlik mektepteri qadaǵalaıdy. Ekinshi baǵyt – materıaldyq-tehnıkalyq bazany jańartý. Úshinshisi – mektepterdi ádistemelik jaǵynan súıemeldeý. Tirek mektep ózge mektepter úshin tartylys ortalyǵyna aınalady. Olar bilim berý, ádistemelik jáne basqa da mindetterdi birlesip atqaratyn birtutas keshen retinde jumys isteıdi», deıdi Danııar Toqtarbaev.
Aıta keteıik, búginde elimizde osyndaı 80 mektep bar, taǵy 110 bilim oshaǵyn ashyp, jaraqtandyrý josparlanyp otyr. Búginde Jetisý oblysynda «Aýyldyq aımaqtardaǵy tirek mektepterdiń áleýetin arttyrý» jobasyna 2022-2023 jyldary 4 mektep tartyldy, olardyń árqaısysyn qaıta jabdyqtaýǵa 250 mln teńgeden bólindi. Bular – Aqsý aýdanyndaǵy E.Sıqymova atyndaǵy orta mektep, Eskeldi aýdanyndaǵy K.Shestakov atyndaǵy orta mektep, Sarqan aýdanyndaǵy Abaı atyndaǵy gımnazııa mektebi jáne Kerbulaq aýdanyndaǵy Qoǵaly orta mektebi.
Oblystyq bilim basqarmasynyń málimetinshe, balalardy baǵdarlamalaýǵa, robottehnıkaǵa, qurastyrýǵa úıretý múmkindikterin arttyrý, olarǵa ınjenerlik daǵdylar baǵytynda qoljetimdi sapaly bilim berý úshin «Qazaqstan halqyna» qorynyń, Injenerlik bilim berýdi damytý» qorynyń jáne «Arman Injınırıng» kompanııasynyń qoldaýymen «Bolashaq ınjener-1» jobasy iske asyryldy. Sonyń sheńberinde Alakól, Aqsý, Sarqan, Eskeldi, Kóksý, Qaratal, Kerbulaq aýdandarynda taǵy 7 mektep robottehnıka jıyntyǵymen qamtamasyz etildi. Jyl sońyna deıin «Bolashaq ınjener-2» jobasynyń aıasynda Tekeli qalasyndaǵy taǵy bir robottehnıka kabınetin jabdyqtaý josparlanyp otyr. Oblys kóleminde jalpy somasy 71 mln teńgeden astam ınvestısııa tartylatyn bolady.
Jetisý oblysy
