Batys Qazaqstan oblystyq energetıka jáne turǵyn úı-kommýnaldyq sharýashylyq basqarmasynyń dereginshe, óńirdegi gaz tapshylyǵy Atyraý munaı óńdeý zaýyty kúrdeli jóndeýge jabylǵan soń qalyptasqan. Bıylǵy 1 qazan men 3 qarasha aralyǵynda Atyraý zaýyty jumysyn toqtatqandyqtan, Batys Qazaqstan oblysyna qajetti 3240 tonna suıyq otyn «SNPS-Aqtóbemunaıgaz» kompanııasynan bólingen.
– 1 qarasha kúngi málimet boıynsha Aqtóbeden bólingen suıyq otyn tolyq kólemde temirjol bóshkelerine tıelip, Oralǵa attandyrylǵan. Eki aradaǵy irkilis júktiń Tuztóbe (Sol-Ilesk) stansasynda turyp qalýyna baılanysty bolyp tur. Olardy Oralǵa jetkizetin teplovoz bolmaı qalǵan. Batys Qazaqstan oblysy ákimdigi, «Qazaqstan temir joly» ulttyq kompanııasy jáne Energetıka mınıstrligi suıyq otyndy Oralǵa kidirtpeı jetkizý úshin kúndelikti áreket etýde. Sonyń nátıjesinde, qazir kidiris joıyldy. Qazan aıynyń 31-inde tıelgen 5 vagon Batys Qazaqstan oblysyna búgin jetýi kerek, – dep túsindirdi bizge Batys Qazaqstan oblysynyń energetıka jáne turǵyn úı-kommýnaldyq sharýashylyq basqarmasy basshysynyń orynbasary Mırjan Nurtazıev. Bul áńgime 1 qarasha kúni boldy.
Basqarmanyń málimetinshe, 30 qazan kúni Atyraý munaı óńdeý zaýyty jumysyna qaıta kirisip, Batys Qazaqstan oblysyna qajetti suıyq otyndy bere bastaǵan. Qarasha aıynda oblysqa barlyǵy 3522 tonna suıyq otyn bólingen.
«О́ńirde qazir 400 tonna suıytylǵan otyn qory bar. Bul 3 kúnge eseptelgen. Al oblystyń aılyq tutyný kólemi – 4,0 myń tonna». Bul – basqarma bergen sońǵy aqparat.
Janarmaı quıý beketterinde qazir suıyq otynnyń baǵasy lıtrine 64 teńgeden satylyp jatyr. Biraq gaz tapshylyǵy, uzyn sonar kezek ázirge áli de bar. «Bizdi WhatsApp jelisindegi «Gaz qaıda bar?» atty top qutqaryp tur. Kóligi gazben júretin júrgizýshiler qajetti sońǵy aqparatty osy jerde bólisip otyramyz», deıdi oraldyq Erkin Qarın.
