Kezdesýdiń alǵashqy mınýtynan eki komanda birden shabýylǵa kóshti. Bıyl chempıondyq ataqqa qol jetkizgen shymkenttik klýb kýbokty alýdy aldyna meje etti. Al el birinshiliginde segizinshi oryndy mise tutqan qostanaılyq klýb aldaǵy jyly Eýrokýbokta synǵa túsý úshin kýbokty jeńip alýy qajet edi. Birinshi kezeńde eki komanda shabýylǵa kóbirek shyqty. Dese de tablodaǵy esepke ózgeris engen joq.
Ekinshi kezeńde de komandalar gol soǵatyn múmkindikti izdedi. Nátıjesinde, oıynnyń 67-mınýtta Islam Chesnokov mergendik tanytty. Osylaısha, «Tobyl» qarsylasynan 1:0 esebimen jeńip, el kýbogynyń ıegeri atandy.
Mundaı ataqqa qostanaılyq klýb sońǵy ret 2006 jyly qol jetkizgen edi. Endi olar aldaǵy jyly Eýropa lıgasynda ekinshi irikteý satysynan synǵa túsedi.
Al «Ordabasy» Chempıondar lıgasynda el namysyn qorǵasa, «Astana» men «Aqtóbe» Konferensııa lıgasynda baq synaıdy.
Oıynnan keıin Kýbok ıegerlerin Qazaqstan kásibı fýtbol lıgasynyń prezıdenti Rafael Garıbıan quttyqtap, rahmetin aıtty.
– «Tobyldy» fınaldaǵy laıyqty jeńisimen quttyqtaımyn. Ádemi oıynymen jankúıerlerge fýtbol merekesin syılaǵan komandalarǵa, eń bastysy, qoldaýǵa kelgen myńdaǵan jankúıerge rahmet aıtqym keledi. Sizderdiń arqalaryńyzda Qazaqstandaǵy fýtbolǵa degen qyzyǵýshylyq damýda. Sizderdiń shynaıy qoldaýlaryńyz, bizdiń komandalar men oıynshylar úshin basty syılyq, – dedi R.Garıbıan.
Aıta ketsek, Qazaqstan kýbogy 1992 jyldan beri turaqty túrde ótkizilip keledi. Búginge deıin «Qaırat» 9 márte kýbokty tóbesine kóterdi. «Jeńis» (Astana) pen «Astana» – 3, «Qaısar» (Qyzylorda) men «Ordabasy» (Shymkent) – 2, «Ertis» (Pavlodar), «Taraz», «Shahter» (Qaraǵandy), «Vostok» (О́skemen), «Aqtóbe», «Almaty», «Tobyl» (Qostanaı), «Dostyq» (Almaty), «Elimaı» (Semeı) bir márteden kýbok ıegeri atandy.
