Ákim saılaýy ótkizilip jatqan 45 aýdannyń, naqtylaı ketsek, 42 aýdan men 3 qalanyń ishinde saılaýshylar sany boıynsha Jambyl aýdany kósh bastady. Muny bizge Jambyl aýdany aýmaqtyq saılaý komıssııasynyń tóraǵasy Jaqsylyq Qarymbaev málimdedi. Atalǵan aýdan boıynsha saılaýda daýys berý quqyǵy bar azamattardyń sany – 105 895. Olardyń aýdan aýmaǵyndaǵy 77 saılaý ýchaskesinde ózderiniń saılaý quqyqtaryn paıdalana otyryp, daýys berýine barlyq jaǵdaı jasaldy. Saılaý komıssııasy músheleriniń sany 534 adamdy qurady.
Aýdandyq saılaý komıssııasy tóraǵasynyń aıtýynsha, halyqtyń belsendiligi joǵary. Máselen, saǵat 10.00-ge deıin saılaýshylardyń 11,7 paıyzy ózderi tirkelgen saılaý ýchaskelerine kelip, tańdaýlaryn jasaǵan. Bul aralyqta saılaý ýchaskelerinde eshqandaı tártip buzýshylyq, zańsyzdyqtar tirkelgen joq.
Sondaı-aq Balqash aýdanynyń turǵyndary da saıası naýqanǵa beıjaı qaramaı, óz tańdaýlaryn jasaýda belsendilik tanytty. Aýdan ákiminiń laýazymyna 3 kandıdat daýysqa tústi. Olardyń 2-eýi ózin-ózi usynsa, 1-eýin «Amanat» partııasy usynǵan.
«Aýdandaǵy 18 452 saılaýshynyń ishinde 274-i alǵash ret daýys berdi. Aýdanda 23 saılaý ýchaskesi, onyń bireýi jabyq saılaý ýchaskesi retinde jumys istedi. Úıden 178 saılaýshy óz tańdaýlaryn jasady», deıdi Balqash aýdanynyń aýmaqtyq saılaý komıssııasynyń tóraǵasy Marat Noǵaıbaı.
Saılaýshylar senimin arqalaǵan ákimderdiń óz mindetterin abyroıly atqaryp, áleýmettiń áleýetin jaqsartýǵa septigi tıer degen úmit basym.
Almaty oblysy
