«Eki aýdandaǵy ákim saılaýynda daýys beretinder sanatyna 34 487 saılaýshy engizildi. Bul oblystaǵy saılaýshylardyń jalpy sanynyń 8,5 paıyzyn quraıdy. Eki aýdan ákiminiń saılaýyna 6 úmitker tirkeldi. Saılaý ýchaskelerinde daýys berý barysyn 11 qoǵamdyq uıymnyń 80-nen astam baıqaýshysy qadaǵalady. Zań buzýshylyq anyqtalǵan joq», dedi A.Aımanakýmov.
Aýdandardaǵy saılaý ýchaskelerinde múmkindigi shekteýli jandardyń kedergisiz daýys berýi úshin qolaıly jaǵdaı jasalǵan. Máselen, Isataı aýdanyndaǵy – 15, Qyzylqoǵa aýdanynyń 16 saılaý ýchaskesinde pandýs ornatylǵan. Saılaý ýchaskeleri taktıldi jolaq, monoblok pen qulaqqap, braıl shrıft, lýpa sekildi quraldarmen qamtylǵan.
Aýdan ákiminiń laýazymyn ıelenýge nıet bildirgen 6 úmitkerdiń ekeýin saıası partııalar usyndy. Úmitkerdiń biri – «Amanat» partııasynyń ókili. Qazaqstan halyq partııasy da saılaý dodasyna bir úmitkerin qosty. О́zin-ózi usynǵan úsh kandıdat aýyldyq okrýgtiń ákimi bolyp jumys isteıdi. Kandıdattardyń arasynda aýdandyq máslıhattyń tóraǵasy, aýdan ákiminiń orynbasary bar.
Bul saılaýdan eki aýdannyń turǵyndary zor úmit kútip otyr. Solardyń qatarynda Isataı aýdanyndaǵy Aqqystaý aýylynda turatyn Ábejanovtar áýleti de bar. Aýyldastary olardy «Dárigerler dınastııasy» dep ataıdy. О́ıtkeni áýlettegi 11 adam osy salany tańdaǵan.
Uzaq jyl aýdandyq jedel járdem brıgadasynda feldsher qyzmetin atqarǵan zeınetker Qadyrjan Ábejanov daýys berýge zaıybyn, bala-kelinin, nemerelerin erte keldi. Onyń zaıyby Meńsulý Esenǵalıeva rentgent medbıkesi bolyp jumys istegen. Al uly Jeńisbek aýdandyq ortalyq aýrýhanada hırýrg, kelini Márııam Sergeıqyzy ýchaskelik dáriger retinde turǵyndar densaýlyǵyn saqtaýǵa úles qosyp júr.
«Aýdan ákiminiń saılaýy alǵash ret ótkizilip otyr. Demek muny eldegi demokratııalyq úrdistiń jemisi retinde baǵalaý qajet. О́ıtkeni halyq saılaǵan aýdan ákimine júkteletin jaýapkershiliktiń júgi jeńil emes. Jańa ákim buqaranyń áleýmettik turmysyn jaqsartý, ásirese jumyssyzdyqty azaıtý, aýyldardy ınjenerlik ınfraqurylymmen qamtý, qum kóshkininen qorǵaý sekildi túıindi máselelerge kóńil bólýi kerek», deıdi Q.Ábejanov.
Al Qyzylqoǵa aýdanynda turatyn zeınetker Tilekbaı Shókenovtiń aıtýynsha, aýdan ákiminiń saılaýy – naǵyz demokratııanyń kórinisi. Sol sebepten, halyqtyń tańdaýyna erik berilip otyr.
«Halyqtyń erkin tańdaý jasaýyna múmkindik berilgeni – demokratııaǵa bet burǵanymyzdyń bir dáleli. Aýdan ákiminiń saılaýy alǵash ret ótkendikten, tańdaý jasaý ońaı bolmady. Biraq munyń aldaǵy saılaýda sabaq bolaryna senemin», deıdi T.Shókenov.
Atyraý oblysy
