Mysaly, Ekinshi dúnıejúzilik soǵystyń ardageri Myrzahmet Jylysbaev alǵashqylardyń biri bolyp óz tańdaýyn jasady. Sanaly ǵumyryn Sozaq aýdanynyń damýyna arnap, elge qyzmet etken aqsaqal Syzǵan aýyl okrýgindegi №701 saılaý ýchaskesinde daýys berdi. «Elimizdiń, aýdanymyzdyń bolashaǵy úshin árbir azamattyń daýysy mańyzdy. Sondyqtan men de jasym 90-nan asqanyna qaramastan tań sáriden kelip, óz tańdaýymdy jasadym. Saıası naýqannan shet qalmadym. Qashanda elimiz aman, beıbitshilik zaman bolsyn», dedi qarııa. Jastarǵa úlgi kórsetken Maqtaaral aýdanyna qarasty Dostyq aýyldyq okrýgi Gúlistan aýylynyń turǵyny Túrikmen Kenjeev – 80 jasta. Tájik etnosynyń ókili osyndaı beıbit elde turyp jatqany úshin qazaq aǵaıyndaryna alǵysy sheksiz ekenin bildirdi. Maqtaaral aýdanynda 1 160 saılaýshy – birinshi ret daýys berý quqyǵyna ıe bolǵandar. Sonymen qatar 11 307 kópbalaly ana men 100 jastan asqan 4 maqtaaraldyq ta óz tańdaýyn jasady.
Jalpy, Sozaq aýdanynda 35 715 azamat saılaý quqyǵyna ıe, al Maqtaaral aýdanynda – 70 648, Báıdibek aýdanynda – 28 807, Shardara aýdanynda 44 109 saılaýshy bar. Túrkistan aýmaqtyq saılaý komıssııasynyń málimetinshe, Báıdibek aýdanynda daýys berýge qatysqan 16 729 saılaýshynyń 9 379-y, ıaǵnı basym bóligi úsh kandıdattyń arasynan «Aýyl» partııasynan túsken Erlan Nurmahanovqa daýys bergen. Al Maqtaaral aýdany boıynsha saılaýshylardyń 29 338-i qoldap daýys bergen, osyǵan deıin Maqtaaral aýdanynyń ákimi bolyp qyzmet atqaryp kelgen Bahyt Asanov saılandy. Sozaq aýdany boıynsha Sozaq aýdanynyń ákim bolyp qyzmet atqaryp kelgen Muhıt Turysbekov saılandy. Ony qoldap 16 016 saılaýshy daýys bergen. Shardara aýdany boıynsha esimi elge málim, qol kúresinen júzdegen álem chempıonyn daıyndaǵan Arman Qarsybaevqa saılaýshylardyń 18 259-y daýys bergen. Sóıtip, úsh úmitkerdiń arasynan ozyq shyqqan aýdandyq máslıhatynyń tóraǵasy qyzmetin atqaryp kelgen Arman Qarsybaev Shardara aýdanynyń ákimi bolyp saılandy.
Túrkistan oblysy
