Konferensııada taıaý jáne shetelderdiń joǵary oqý oryndary men ǵylymı-praktıkalyq ortalyqtarynyń ókilderi, mektepke deıingi bilim berý salasynyń jetekshi sarapshylary men pedagog-praktıkteri bas qosyp, mektepke deıingi jastaǵy balalardy tárbıeleýge qatysty kózqarastaryn ortaǵa saldy. Prezıdent ortalyǵy dırektorynyń orynbasary Botagóz Qaıypova atap ótkendeı, mektepke deıingi balalyq shaqtyń ózindik qundylyǵy osy kezeńniń biregeıliginde jatyr. Onda jeke mádenıettiń negizi, alǵashqy ıdeıalary, tanym tásilderi, tabıǵı jáne áleýmettik ortamen ózara is-qımyl tájirıbesi qalyptasady. Bolashaqta olar damıdy, tereńdeı túsedi, biraq eń basty dúnıeniń bári ómir jolynyń bastapqy satysynda qalyptasady.
«Búginde óskeleń urpaqtyń boıyna tarıhı bilimdi qalyptastyrý jáne damytý, mádenıetimizge degen qurmet pen tereń patrıottyq sezimderdi qalyptastyrý boıynsha keshendi jumys júrgizilip jatyr. Mektep jasyna deıingi balalarmen jumys isteýge erekshe nazar aýdarylady. Sondyqtan Prezıdent ortalyǵy óziniń bilim berý baǵdarlamasyna «Atameken» arnaıy jobasyn engizdi. Onyń negizgi ıdeıasy – bastaýysh mektep jasyndaǵy balalardy týǵan ólkeniń mádenıetimen tanystyrý, júıeli bilim qalyptastyrý, otbasy men mektepte Otanǵa degen súıispenshilikke tárbıeleý. Bul joba aıasynda jyl saıyn 1 myńǵa jýyq bala, ata-ana men pedagogter qatysatyn túrli formattaǵy is-shara ótkiziledi», dedi B.Qaıypova.
Konferensııanyń plenarlyq otyrysynda Balalardy damytý ınstıtýtynyń dırektory Manar Adamova, Reseı ǵylymı zertteý ınstıtýty dırektorynyń orynbasary Igor Shııan, psıhologııa ǵylymdarynyń doktory Manýel Martınez, medısına ǵylymdarynyń doktory, psıhıatrııa kafedrasynyń klınıkalyq dosenti Mehmet Kaıatekın, Malaızııa qalalyq ýnıversıtetiniń Bilim jáne gýmanıtarlyq zertteýler fakýltetiniń aǵa oqytýshysy Zýraımı Nýrdın, О́zbekstan Respýblıkasy mektepke deıingi jáne mekteptik bilim mınıstrligi Mektepke deıingi bilim berý agenttiginiń basqarma basshysy Irına Grosheva, pedagogıka ǵylymdarynyń doktory Larısa Krýglova baıandama jasady.
«Qazir Qazaqstanda álemdik bilim berý keńistigine baǵdarlanǵan jańa bilim berý júıesi qalyptasyp jatyr. Bul úderis oqý-tárbıe qyzmetiniń pedagogıkalyq teorııasy men praktıkasyndaǵy eleýli ózgeristermen qatar júredi. Jańa býynnyń oqý materıaldaryn daıyndaýdaǵy ınnovasııalyq tásiliniń, olardyń fýnksııalary men bilim berý praktıkasynda qoldaný tásilderiniń ózgerýi – bilim berýdi jańǵyrtýdyń quramdas bólikteriniń biri. «Qarlyǵash» balabaqshasy – balalardyń jan-jaqty damýy úshin qolaıly jáne jaqsy jaǵdaı jasalǵan elimizdiń aldyńǵy qatarly mektepke deıingi uıymdarynyń biri. Balabaqshanyń basty mindetteriniń biri – mektepke deıingi bilim berýdiń zamanaýı sapasyn qamtamasyz etý, onyń irgeli jáne jeke tulǵanyń, qoǵam men memlekettiń ózekti qajettilikterine sáıkes kelýi», dedi Prezıdent Is basqarmasy Medısınalyq ortalyǵy basshysynyń orynbasary Lıýdmıla Bıýrabekova.
Konferensııanyń «Inklıýzıvti bilim: teorııa jáne praktıka», «Balalardyń erte damýy», «Mektepke deıingi bilim berýdiń úzdik tájirıbeleri» taqyrybyndaǵy seksııalyq jumysyna Astana, Almaty, Shymkent qalalarynyń, oblystyq bilim basqarmalary men bólimderiniń ókilderi, kásiporynnyń áleýmettik áriptesteri, L.N.Gýmılev atyndaǵy Eýrazııa ulttyq ýnıversıteti, Abaı atyndaǵy Qazaq ulttyq pedagogıkalyq ýnıversıteti, Astana halyqaralyq ýnıversıteti, «О́rleý» biliktilikti arttyrý ulttyq ortalyǵy, Astana qalasy boıynsha kásiptik damý ınstıtýty, Balalardy erte damytý ınstıtýty, Astana qalasy ákimdiginiń Ádistemelik ortalyǵy, «Ulttyq ustaz» onlaın akademııasy, BUU Balalar qory belsendi qatysyp, sheberlik synyptar aıasynda ádistemelerin usyndy.
Oqý-aǵartý mınıstrligi Mektepke deıingi bilim departamenti dırektorynyń mindetin atqarýshy Gúlnar Ysqaqovanyń aıtýynsha, qazirgi ýaqytta ata-analardyń áleýmettik suranysy ózgergen. Buryn ata-analar úshin densaýlyq saqtaý jáne bala kútimi mańyzǵa ıe bolsa, búginde balanyń damýyna da kóbirek den qoıady.
«Biz mektepke deıingi tárbıe men oqytýdyń aýqymdy ózgeristeri men jańǵyrýynyń kýási bolyp otyrmyz. Bul, óz kezeginde, mektepke deıingi uıymnyń pedagogine jańa talaptar qoıady. Munda qarapaıym tárbıeshige emes, kásibı jetilgen muǵalimge degen qajettilik týyndaıdy. Kásibı damý jáne jeke ósý múmkindigin keńeıtý úshin, sondaı-aq biryńǵaı talaptardy ázirleý maqsatynda Oqý-aǵartý mınıstrligi pedagogtiń kásibı standartyn bekitti. Onda mektepke deıingi bilim berý pedagoginiń kásibı quzyretteri aıqyndaldy», dedi G.Ysqaqova.
Sondaı-aq balabaqsha dırektorynyń orynbasary Alma Qarabaeva: «Biz óz tarapymyzdan bilim sapasyn kóterýge, ózgertýge úlesimizdi qosqymyz keledi», dep atap ótti.
Mektepke deıingi uıymdardyń praktıkasyna qatysýshylar konferensııa qorytyndysy boıynsha taqyryptyń mańyzdylyǵyn jáne is-sharanyń joǵary deńgeıde uıymdastyrylǵanyn atap ótip, ǵylymı yntymaqtastyqqa ári osyndaı kezdesýlerdi jalǵastyrýǵa nıet bildirdi.
