Foto: Instagram/@aliokapov
Eske sala ketsek, ánshi bul marapattan bas tartqan edi.
Májilis alańynda jýrnalıster mınıstr Aıda Balaevadan ánshiniń tóńireginde bolǵan jaǵdaı qalaı sheshilgenin surady.
«Sońǵy ýaqytta áleýmettik jelilerde qoǵamnyń barlyq jetistikterin joqqa shyǵarǵysy keletinder kóbeıip ketti. Bul jaqsylyqqa aparmaıdy. Shyndyǵynda, barlyǵy óz isiniń mamany boldy. Ár sarapshynyń óz salasy boıynsha pikir bildirýi óte mańyzdy jáne bul bilikti kásibı pikir bolýy tıis. Al «Nege berildi? Ne úshin berildi?» degen suraq qoıý durys emes», dedi mınıstr jýrnalısterdiń suraqtaryna jaýap bere otyryp.
Mınıstrdiń aıtýynsha, ánshi halyqtyń tarapynan jasalǵan qysymdy emosıonaldy túrde qabyldaǵan.
«Bul sheshimdi bir mınıstrlik qabyldamaıdy. Bólek komıssııa qarap, marapatqa ıe adamdy tańdaıdy, al el azamattary memlekettiń damýyna úles qosýy óte mańyzdy. Memleket barlyq eńbekti baǵalaıdy. Biz óz azamattarymyzdy árdaıym jigerlendirip, yntalandyryp otyrǵanymyz óte mańyzdy. Bir qyzyǵy, nege bizdiń «sarapshylarda» muǵalimderge, dárigerlerge, zaýyt jumysshylaryna sonsha kóp marapat berildi degen suraq týyndamaıdy. Olardyń jetistigi týraly nege aıtpasqa. Bálkim, elimizdiń damýyna orasan úles qosyp júrgen batyrlardy kórsetý mańyzdy bolar edi, ıá? Al memleket ár adamnyń eńbegin baǵalaıdy», dep túsindirdi mınıstr.
Sondaı-aq jýrnalıster «Ánshi «Qurmet» ordenin jáne basqa da marapattaryn memleketke qaıtardy ma?» degen suraq qoıdy.
«Joq, ony qaıtarýǵa bolmaıdy. Bul durys emes. Álı Oqapov áleýmettik jelilerdegi heıtke emosıonaldy túrde jaýap berdi. Qazirgi «sarapshylar» kez kelgen máseleni synı pikirsiz qaldyrmaıdy. Bul da durys emes. Biz Álı Oqapovpen áńgimelestik, ol shyǵarmashylyq adam retinde bul pikirlerdi óte emosıonaldy túrde qabyldady, qazir sabyrǵa keldi», dep jaýap berdi mınıstr.
Esterińizge sala keteıik, qazan aıynda ánshi Álı Oqapov «Qurmet» ordenimen marapattalǵan edi. Áleýmettik jelilerde bul jańalyq qoldanýshylar arasynda daý týdyrdy, keıbiri Oqapovty «buǵan laıyq emes» jáne «el úshin eshteńe istemedi» dep aıyptasa, endi biri ánshiniń jaǵynda boldy.
Synı pikirlerden keıin Álı Oqapov barlyq marapattarynan, onymen qosa «Qurmet» ordeninen bas tartatyny týraly beınejazba túsirgen edi.
