Osy oraıda Densaýlyq saqtaý mınıstri Ajar Ǵınııat barsha ata-ananyń qaperine balalaryn qyzylshaǵa qarsy ýaqtyly vaksınalaýdyń mańyzdy ekenin aıtyp, úndeý tastady.
«Búgin nemerem ekeýmiz álem elderindegideı bizdiń elimizdegi qolaısyz epıdemııalyq jaǵdaıdy eskere otyryp, qyzylshaǵa qarsy ekpe alý úshin qalalyq emhanaǵa keldik. Elimizde osy ahýaldyń nasharlaýy qyrkúıek aıynan bastap baıqaldy, balalar uzaq ýaqyt jabyq úı-jaılarda ótkizetin mektepke bardy», dedi mınıstr Astana qalasynyń №9 emhanasynda.
Mınıstr bul ınfeksııanyń juqpaly ekenin, ásirese jótelgende, túshkirgende aýa arqyly tez taralatynyn atap ótti.
«Sondyqtan biz keıingi eki aıda bul aýrýdyń kúrt óskenin kórip otyrmyz. 13 myńnan asa adam aýyryp qaldy, onyń 83%-yn negizinen 5 jasqa deıingi balalar quraıdy, ekpe almaǵan eresekter de bar. Búginde qyzylshamen syrqattanǵan naýqastardyń 70 paıyzy – vaksına saldyrmaǵan balalar. Olardyń kópshiligi, ıaǵnı 60 paıyzy vaksınalaýdan bas tartqan», dedi A.Ǵınııat .
Mınıstrdiń aıtýynsha, sondaı-aq syrqattardyń 18%-y medısınalyq qarsy kórsetilimderge baılanysty jáne 22%-y egý jasyna jetpegendikten ekpe almaǵan kórinedi. Búgingi tańda barlyǵy 2 013 bala, onyń ishinde 30 bala aýyr jaǵdaıda emdeýge jatqyzylypty.
Kollajdy jasaǵan – Záýresh SMAǴUL ,«EQ»
Onyń aıtýynsha, qyzylshamen syrqattaný kúrt óskendikten, qosymsha ımmýndaý júrgizý týraly sheshim qabyldandy. Bul naýqan qańtar aıynyń sońyna deıin sozylady, al dertke qarsy vaksına tolyqtaı jetkilikti.
«Qyzylshaǵa qarsy profılaktıkalyq ekpesi joq balalarǵa vaksına salamyz. Infeksııa oshaqtarynda ekpe almaǵandarmen baılanysta bolǵandardy da vaksınalaımyz. Barshańyzdy aýrýdan saqtaný úshin emhanaǵa shaqyramyz», dedi mınıstr.
Osy oraıda vedomstvo basshysy ınfeksııalyq aýrýdyń saldary týraly eskertti.
«Qyzylsha pnevmonııa, túrli qabyný, otıt sekildi soqyrlyqqa deıin qaýipti asqynýlarǵa ákelýi múmkin. Búgingi tańda qyzylshany emdeýdiń ózine tán emi joq, sondyqtan mundaı qaýipti ınfeksııadan saqtanýdyń jalǵyz joly – tek vaksınalaý. Vaksınanyń ózinen qoryqpaý kerek, bul ábden tekserilgen, biz ony jyl saıyn ulttyq egý kúntizbesine sáıkes qoldanamyz», dedi A.Ǵınııat.
Vaksınalaý erejelerine sáıkes ımmýndaý pedıatr balany teksergennen keıin ǵana júrgiziledi. Oǵan anamnez jınaý, temperatýrany ólsheý, egiletin adamnyń jaǵdaıyn baǵalaý kiredi. Sodan keıin egýge aqparattandyrylǵan kelisimge qol qoıylady. Ári qaraı ımmýndaýdan keıin 30 mınýttyń ishinde vaksına alǵan náreste dárigerlerdiń baqylaýynda bolady.
Qyzylshaǵa qarsy profılaktıkalyq egý kúntizbesine sáıkes elimizde josparly túrde eki ret vaksınalaý júrgiziletin eske sala keteıik. Atap aıtqanda, bala alǵashqy ekpeni 12-15 aılyǵynda, ekinshisin 6 jasta alady.
Bıyl vaksınalaý halyqtyń mynadaı toptaryna: 6 aıdan bastap 10 aı 29 kún bolǵan balalarǵa, 2 jastan bastap 4 jas 11 aı 29 kún bolǵan balalarǵa, sondaı-aq buryn ekpe almaǵan medısına qyzmetkerlerine (55 jasqa deıin), profılaktıkalyq ekpe almaǵan 18 jasqa deıingi adamdarǵa júrgiziledi.
Jalpy, 2023 jyldyń basynan bastap respýblıka boıynsha qyzylshanyń 12 671 jaǵdaıy tirkeldi. Onyń ishinde 10 563 naýqas – 14 jasqa deıingi balalar, 354-i – jasóspirimder, 1 754-i – eresekter.
Halyq arasynda qyzylshanyń taralýynyń aldyn alý jáne eldegi epıdemııalyq jaǵdaıdy turaqtandyrý maqsatynda «Qyzylshaǵa qarsy sanıtarlyq-profılaktıkalyq is-sharalar júrgizý týraly» bas memlekettik sanıtarııalyq dárigerdiń 2023 jylǵy 1 qarashadaǵy №7 qaýlysy shyǵaryldy. Kórsetilgen qaýlyǵa sáıkes bıyl 6 qarashadan bastap qyzylshaǵa, qyzamyqqa jáne parotıtke (QKP) qarsy 6-11 aılyq balalarǵa, jeltoqsannan bastap qyzylshanyń egý mártebesine qaramastan 2-4 jastaǵy balalarǵa qosymsha jappaı ımmýndaýdy júrgizý bastaldy.
