Qazaqstan shahmat federasııasynyń bastamasymen qolǵa alynǵan jobanyń maqsaty – shahmatty el arasynda keńinen nasıhattaý. Grand-fınaldyń ashylý saltanatynda oblys ákiminiń orynbasary Beısenbaı Tájibaev elimizdiń túkpir-túkpirinen kelgen qatysýshylarǵa sáttilik tilep, ystyq yqylasyn jetkizdi. Osy joba nátıjesinde qoǵamda shahmatqa degen suranys artqanyn, al Túrkistan óńirinde qazir 3 myńnan asa bala shahmatpen aınalysatynyn atap ótti.
Iá, qyrkúıektiń 10-y kúni Astanadan shyqqan avtokerýen sahna men arnaıy «shahmat» kıiz úıi bar júk kóligimen birge 14 myń shaqyrymnan asa jol júrdi. Federasııa málimetine júginsek, chempıonat barysynda jalpy 1 800 partııa oınalyp, 400 shahmatshy 60 kún boıy jartylaı fınalda ózara baq synasqan. Joba aıasynda ár oblysta federasııanyń fılıaldary ashylyp, jańa tóraǵalar taǵaıyndaldy. «Shahmat kerýeni» – úlken armandar oryndalatyn meken. Munda jasyna, jynysyna, áleýmettik jaǵdaıy men shyqqan jerine qaramastan, árbir talantty adam óz otandastarynyń ortasynda chempıon bola alady. Sońǵy birneshe aıdyń ishinde biz bul jobanyń kezekti týrnırlerden áldeqaıda mańyzdy ekenin túsindik. Sonyń arqasynda el ıntellektýaldaryn bir arnaǵa toǵystyra aldyq», dedi Qazaqstan shahmat federasııasynyń prezıdenti Tımýr Týrlov.
Jalpy, júlde qory 16 mln teńgeni quraıtyn, el tarıhyndaǵy alǵashqy joba «Freedom Broker» bas seriktesiniń qoldaýymen júzege asyp otyr.
«Statıstıka boıynsha shahmattan tájirıbesi bar adamdar qor naryǵynda joǵary nátıjege jetedi eken. Adamı kapıtaldy arttyrý, strategııa qurý men synı oılaý jaǵynan da ol árqashan basymdyqqa ıe. Sol sebepti biz shahmatqa ınvestısııa quıyp jatyrmyz», dedi «Freedom Broker» basqarma tóraǵasynyń orynbasary Túsip Núkenov.
Sonymen, Túrkistanda oıynshylardyń salystyrmaly kúshin esepteý ádisimen ELO reıtıngi 2000-ǵa deıingi aqtyq synǵa shyqqan 60 shahmatshy 11 týrdan turatyn týrnırde básekege túsip, nátıjesinde, 6 jeńimpaz júldeli syılyqtarǵa ıe boldy. Naqtyraq aıtsaq, Nurmuhammed Qabınazar 1-oryndy ıelenip, 5 mln teńge aldy. Týrnırdiń 12 jastaǵy jeńimpazy Nurmuhammed Qabınazar shahmatpen 4 jasynan bastap aınalysyp keledi. Endigi maqsaty – grossmeıster men FIDE sheberi ataný. Al júldege alǵan 5 mln teńgeniń basym bóligin jas jeńimpaz qaıyrymdylyqqa jumsaıtynyn málim etti. 2-oryndy Borıs Cherkasov (2,5 mln teńge), 3-oryndy – Súleıman Ahmet
(1 mln teńge) ıelense, 4-orynǵa – Muhtar Aınaqul (500 myń teńge), 5-orynǵa – Madııar Altynbekuly (300 myń teńge), 6-orynǵa – Ánýar Toqbaev (150 myń teńge) kóterildi. Sondaı-aq Ásel Lesbekova (Áıelder arasyndaǵy úzdik nátıje), Aleksandr Vıýnıchenko (50 jastan asqandar boıynsha), Stepan Lıýsık (20 jasqa deıingi kórsetkish), Aqylbek Jaqsylyq (16 jasqa deıingiler arasynda), Ernazar Isýmbaev (ELO reıtıngi 2000-ǵa deıin), Áselaı Seıdýlla (ELO reıtıngi 1800-ge deıin), Dmıtrıı Danılov (ELO reıtıngi 1600-ge deıin), Ernur Erjanuly (ELO reıtıngi 1400-ge deıingi úzdik nátıje) atalymdary boıynsha marapattalyp, 100 myń teńgelik aqshalaı sertıfıkattarǵa ıe boldy.
TÚRKISTAN
