Bul joba – tek týrıstik maqsatta emes, eki el arasyndaǵy ekonomıkalyq yqpaldastyqty tereńdetýge múmkindik beretin basty baǵyttyń biri. Nátıjesinde, jańa týrıstik joldar ashylmaq. Búginde elimizdiń 13 qalasyna «Ashyq aspan» rejimi engizilip, 80 memlekettiń azamatyna vızasyz kelýge ruqsat berilip otyr. Qytaı da sol qatarǵa qosyldy.
«Qazaqstan Qytaı týrısteri úshin tartymdy baǵyttyń biri bola alady. Otyz kúnge deıin vızasyz júrý týraly úkimetaralyq kelisimge qol qoıyldy. Bul qadam elimizge Qytaıdan týrısterdiń kóptep kelýine jol ashary sózsiz», degen edi Memleket basshysy.
Degenmen vızasyz rejimniń kúshine enýi shekaradaǵy baqylaý beketteri men aýmaqtaǵy basqa da qyzmetterdiń jumysyna qosymsha salmaq túsirgeli tur. Ásirese kólik qozǵalys, jolaýshylar tasymaly, qonaqúı men tamaqtaný oryndarynyń qyzmetine qatysty daıyndyq jumystaryn shıratý kún tártibinde. Bul jumys Jetisý oblysynyń Panfılov aýdanynda da júrip jatyr. Aýdan aýmaǵynda birneshe shekaralyq beket bar. Onyń ishinde «Nur joly» ótkizý beketiniń jumysy qyzaıyn dep tur. Eki el azamattary negizinen osy beket arqyly ótip, qatynaıdy.
Osyǵan oraı Panfılov aýdany ákimdiginiń janyndaǵy kezekten tys aýdandyq jedel shtab otyrysy ótti. Otyrysta Qytaı elimen vızasyz rejimniń kúshine enýine baılanysty shekaralyq aýmaqta týyndaıtyn máseleler talqylandy.
Jıynǵa prokýratýra, ulttyq qaýipsizdik komıteti, shekara, keden qyzmeti men quqyq qorǵaý organdarynyń basshylary, sondaı-aq ózge de mekeme basshylary qatysty.
Otyrysta aýdan ákimi Marat Saǵymbek «Nur joly» ótkizý beketindegi jolaýshylardy qabyldaý bólimi ondaǵy kórsetiletin qyzmetter túri men avtobýs tasymaly syndy máselelerdi jetkizip, birqatar mekeme basshysyna kemshilikterdi joıý týraly tapsyrma berdi.
«Vızasyz rejim elimizdegi týrızmdi damytýǵa serpin beredi. Biz týrıstik aımaq retinde sapaly qyzmet kórsetýimiz qajet. Bul bizdiń aýdanymyzdyń ekonomıkasy úshin aıtarlyqtaı paıdaly. Bolashaqta túrli qyzmet kórsetý ornyn ashyp, týrıstik baǵytta jumystar júrgizbekpiz. Qazirdiń ózinde oǵan qatysty josparlarymyz bar. Bastysy – shekara mańyn tártipke keltirip, bárin bir jolǵa qoıyp, zańdy túrde jumys júrgizý mindeti tur», deıdi Panfılov aýdanynyń ákimi M.Saǵymbek.
Osy maqsat sheńberinde Qytaı Halyq Respýblıkasynyń ShUAR halyqaralyq saýdany damytýǵa járdemdesý komıteti men Jetisý oblysynyń kásipkerler palatasy arasynda Halyqaralyq yntymaqtastyq týraly memorandýmǵa qol qoıyldy. Bul mańyzdy saıası rásim QHR Shyńjań-Uıǵyr avtonomııalyq ólkesiniń Úrimji qalasynda ótken «Qytaı-Ortalyq Azııa» forýmy barysynda júzege asty.
Memorandýmdy tabysty iske asyrý Qazaqstan men Qytaı arasyndaǵy saýda-ekonomıkalyq, ǵylymı-tehnıkalyq baılanystardy keńeıtýge múmkindik beredi. Osylaısha, iskerlik baılanystardy damytý, ózara tıimdi yntymaqtastyqty keńeıtý, ınvestısııalar tartý úshin qolaıly jaǵdaılar jasalady.
«Memorandým eki eldiń shaǵyn jáne orta bıznes sýbektileri arasyndaǵy yntymaqtastyqty nyǵaıtýǵa septigin tıgizedi, saýda salasynda seriktester izdeýdiń jańa múmkindikteri ashylady», deıdi oblystyq kásipkerler palatasynyń tóraǵasy Dáýren Ońalbaev.
О́z kezeginde Qytaı halyqaralyq saýdany damytýǵa járdemdesý komıteti basshysynyń orynbasary Chen Szıanan komıtet úkimettik deńgeıde Qazaqstan taýar óndirýshileriniń Qytaı jáne shetel naryqtaryna shyǵý múmkindikteriniń spektrin keńeıtýge járdemdesýge daıyn ekenin atap ótti.
Forýmǵa Qazaqstannan ǵana emes, О́zbekstan, Reseı, sondaı-aq TMD men álemniń basqa elderinen ókilder qatysty. Halyqaralyq is-sharaǵa qatysýshylar Shyńjańda Halyqaralyq arbıtraj platformasyn qurý saýda daýlary boıynsha tıimdi sheshimderdi ilgeriletý úshin mańyzdy ekenin atap ótti. Is-shara sońynda Qytaı halyqaralyq saýda jáne ekonomıkalyq tórelik komıssııasynyń Ortalyq Azııa fılıaly quryldy.
Jetisý oblysy
