Berik Jetpisbaevtyń esimi sportsúıer qaýymǵa etene tanys. Jetisý oblysy Kerbulaq aýdanynyń Qoıankóz aýylynda týyp-ósken ol ótken ǵasyrdyń toqsanynshy jyldary álemdik deńgeıde moıyndalǵan samboshylardyń biri ári biregeıi boldy. Baqyt Qoqysbekovteı bilikti bapkerden tálim-tárbıe alǵan keıipkerimiz bozbala shaǵynda-aq kóptegen týrnırde top jaryp, dara talantymen oqshaýlandy. Shalǵaıdaǵy aýylda asa daryndy sportshynyń ósip kele jatqanyn ańǵarǵan dańqty bapker, uzaq jyldar boıy ulttyq quramany jattyqtyrǵan Kereı Qoıshybektiń ózi «Berik – týma talant. Eger ár jattyǵý barysynda janyn salyp daıarlanyp, ár jekpe-jekte jankeshtilik tanytsa, onyń shoqtyǵy bıik bolary sózsiz» dep biraýyz sózben túıindedi.
«Sambonyń akademıgi» atanǵan Kereı aǵa qatelespegen eken. 18 jasynda Qazaqstannyń ulttyq quramasynyń jeıdesin kıgen Jetpisbaev 57 jáne 62 kg salmaq dárejelerinde kúsh synasyp, qysqa ǵana merzim aralyǵynda kóptegen bıik belesti baǵyndyrdy. Atap aıtsaq, ol 1994 jyly Novı Sadta jasóspirimderdiń álem birinshiliginiń kúmis júldegeri, 1995 jyly Sofııada jastar arasynda álem chempıony jáne Tokıoda eresekter arasynda álem chempıonatynyń qola júldegeri atandy. 1996-1997 jyldary qatarynan eki ret Azııa chempıonatynda aldyna jan salmasa, Álem kýboginde de eki márte jeńis tuǵyryna kóterildi. «Sambonyń atasy» Anatolıı Harlampıevtiń týrnırinde úzdikter sanatyna qosyldy. Odan bólek, birqatar asa iri halyqaralyq jarystarda qarsylas shydatpady.
– Tabys adamǵa ózdiginen kelmeıdi. Tipten, jankeshti jattyǵý men «jan alysyp, jan berisken» aıqastyń ózi bıik tuǵyrǵa kóterilý úshin jetkiliksiz. Birinshiden, ózińe degen senimiń myǵym jáne alǵa qoıǵan maqsatyń aıqyn bolýǵa tıis. Ekinshiden, elishilik jarystardaǵy qarsylastaryń neǵurlym myqty bolsa, halyqaralyq arenada kúresý soǵurlym jeńil. Úshinshiden, qaltaly azamattardyń qoldaýy qajet. Sebebi ashqursaq sportshynyń alysqa barmaıtyny belgili. Mende onyń úsheýi de boldy. Alǵa qoıǵan maqsatym el senimin aqtap, qazaqtyń abyroıyn asqaqtatý edi. Ol josparym oıdaǵydaı júzege asty dep oılaımyn. Elishilik jarystarda kileń yǵaı men syǵaıǵa qarsy turdym. Aıdyn Smaǵulov, Muratbek Qypshaqbaev, Qaırat Kúnsafın, Aıdar Qaıyrbaev, Erlan Silámbaı... Alǵashqysy Olımpııa oıyndarynyń júldegeri atandy, qalǵany álemdik dodalarda olja saldy. Solarmen alysyp-julysyp sheberlik deńgeıim ósti. Al qamqorshy aǵalarym jaıynda aıtar bolsam, ol jaǵynan da kende emespin, – deıdi Berik Sársenbekuly.
Bir keremeti, Jetpisbaev sambomen birge dzıýdony da qatar alyp júrdi. Bul rette onyń eki birdeı Olımpııa oıyndarynda kúsh synasýǵa múmkindigi boldy. Kúrestiń bul túrinde keıipkerimiz bilikti bapker Manarbek Taýtanovtan tálim-tárbıe aldy. Áli esimizde, 1996 jyly Almatyda Sanjar Jandosovty eske alýǵa arnalǵan halyqaralyq týrnır dúrkirep turyp ótti. Bul Atlanta Olımpıadasyna irikteý edi. Sol tusta Berik sambodan dzıýdoǵa endi ǵana aýysyp jatqan. Soǵan qaramastan 66 kg salmaqtaǵy basty favorıtter Zeken Shaımerdenov pen Ivan Baǵlaevty aıqyn basymdyqpen utyp, maıtalman mamandardyń nazaryn birden ózine aýdardy. Sol kezde kópshilik Jetisý óńirinen kelgen jalyndy jasty endi toqtatatyn eshkim tabyla qoımas dep oılady. Biraq qapııada jaraqat alǵan Jetpisbaev qola medaldi qanaǵat tutty.
2000 jyly Sıdneı Olımpıadasy qarsańynda shekten tys salmaq qýamyn dep syn saǵatta densaýlyǵy syr berdi. Bul syrqattan aıyǵý ońaı bolmady. Osyndaı keleńsiz jaǵdaılardyń saldarynan Jetpisbaev eki birdeı ǵalamdyq dodadan shet qaldy. Jýrnalıster qaýymynyń «Olımpııa oıyndaryna qatysa almaǵanyńyzǵa ókinbeısiz be?» degen saýalyna «Pesheneme solaı jazylǵan bolar. Maqsat taýyna shyǵa almaı ketken daryndy jastar jalǵyz menimen ǵana shektelmeıdi ǵoı. Aramyzda ondaı asqan daryn ıeleri óte kóp. Men – solardyń biri ǵanamyn. Bul ómirde árkimniń óz tańdaýy bolady. Men bozkilemde ózime buıyrǵan nesibemdi aldym da, úlken sporttan qol úzýdi jón kórdim. Sondyqtan da ótkenge esh ókpem joq», dep ataqty sportshy áńgimeni qysqa qaıyrdy.
Úlken sporttan qol úzgennen keıin Berik bapkerliktiń qamytyn kıdi. Jastardy jattyqtyrdy. Olarǵa rýhanı jáne materıaldyq turǵydan kómek kórsetti. Onyń tól shákirtteriniń biri álem chempıonatynda júlde alsa, ekinshisi jasóspirimder arasyndaǵy Dúnıejúzilik Olımpıadanyń jeńimpazy atandy. Sol úshin de Jetpisbaevqa Qazaqstannyń eńbek sińirgen jattyqtyrýshysy ataǵy berildi.
– Berik, shyn máninde, asqan daryn ıesi edi. Biz úlken sportqa endi kelip jatqan tusta onyń dańqy dúrkirep turdy. О́zine ǵana tán mánerde kúresip, qarsylasyn qoǵadaı japyryp jatqanyna san márte kýá boldyq. Jetpisbaev sheginýdi, tartynýdy, qaımyǵýdy bilmeıtin. Bizge únemi dáp bir «О́lispeı berispeımin» degen qaǵıdany ustanatyndaı kórinetin. Keıinnen ulttyq qurama sapynda birge kúrestik. Qatar júrip komandalyq áriptes retinde ǵana emes, aǵaly-inili bolyp syılastyq. Berikten biz kóp nárse úırendik, – deıdi dzıýdodan Dúnıejúzilik Olımpıadanyń jeńimpazy, Azııa chempıonatynyń kúmis júldegeri Erlan Silámbaev.
Al jarystyń ózine keler bolsaq, uldar arasynda myna balýandar jeńimpaz atandy: 50 kg – A.Erǵalıev (Almaty qalasy), 55 kg – Ǵ.Orynqajy (Abaı), 60 kg – S.Sýhorýkov (Almaty qalasy), 55 kg – R.Narıman (Jetisý), 73 kg – T.Shyńǵaev (Abaı), 81 kg – A.Beısembaı (Almaty qalasy), 90 kg – A.Rızabek (Abaı) jáne +90 kg – B.Toqtar (Almaty oblysy). Al qyzdardyń saısynda esimderi tómende atalǵan dzıýdoshylar altynnan alqa taqty: 40 kg – S.Maqsutova (Almaty oblysy), 44 kg – A.Ánýarova (Almaty oblysy), 48 kg – S.Taǵaı (Túrkistan), 52 kg – J.Maratbek (Jetisý), 57 kg – B.Dastanqyzy (Almaty qalasy), 63 kg – A.Ábihanova (Shyǵys Qazaqstan), 70 kg – Ǵ.Marlen (Jambyl) jáne +70 kg – N.Kemelhanqyzy (Jetisý).
