Sýretti túsirgen – Erlan OMAR, «EQ»
Tolybaı synshy jolaýshylap kele jatyp, anadaı jerde jatqan attyń qý basyn kózi shalady. Tizgindi tartyp tura qalyp: «Mynaý eren júıriktiń basy eken, ımek tumsyq, bóken tanaý, kóziniń oıyndysy tereń, jar qabaq, eki jaqtyń ortasy alshaq, tisteri áli jaltyrap tur, súıegi qandaı asyl edi janýardyń. Myna tumsyǵyna qaraǵanda shoqtyǵy bıik, aıaǵy uzyn, qoıan tirsek, serpini qatty, sińirli eken. Qumdaýyt, bosań, kóbeleń jerde báıge bermeıtin jylqy. Jasy toǵyzdan asyp, onǵa qaraǵan der shaǵynda ólgen eken, janýar. Attyń ólgenine úsh jyl bolypty», depti.
Qasyndaǵylar shyn júıriktiń syny qalaı? – degende: – Shyraqtaı janǵan tomaǵa kózi bolady, etekteı erini bolady, qas albasty qabaqty keledi, ot ornyndaı tuıaqty keledi. Al shyqshyty oralyp jatqan túbekteı bolady, qulaǵy kólge bitken quraqtaı bolady, jaly kúltelengen jibekteı bolady. Quıryǵy qynaptan shyqqan qanjardaı, jaýyryny sypyra shapqan taqtaıdaı, omyrtqasy otaýdaı bolady. Myqyny tar, saýyry zentekti qara kómirdeı, jambasy usta soqqan sandaldaı bolady. Kebeje qaryn, keń qursaq, súbelik jeri tastan soqqan qorǵandaı, tósi tastan qulaǵan bulaqtaı, baqaıy qysqa, moıyny qulja moıyn, baýyzdaý jeri pisken alma saǵaqty keledi, depti.
Jas tulpardyń synyn toltyryp, sıpatyn jetildirý úshin, aldymen onyń súıegin aǵartady, bel qyzyǵyna qandyrady, kóńilin kóteredi. Ol úshin jas baıtaldardy tańdap alyp úıirge salady.
Jyl ótken soń úıirdegi bir baıtaldy soıyp jiliginiń kemigin kóredi. Eger jilik ishi qarakemik bolsa, tulpardyń syny áli tolǵan joq dep kóredi de, úıirden almaıdy.
Keler jyly taǵy bir baıtaldy soıyp, jiligin baıqaıdy. Osylaı soıylǵan baıtaldardyń jiligi aǵarǵanǵa deıin tulpardy úıirden almaıdy. Al soıylǵan baıtaldyń jilik kemigi ábden aǵarǵan kezde tulpardyń syny toldy, kúshi jetildi, kúıine keldi dep kóredi. Odan keıin ony baptap báıgege qossa, aldyna qara salmaıtyn sáıgúlik bolady.
