Foto©Shutterstock
«Prezıdent Is basqarmasyna qarasty «Býrabaı» ulttyq saıabaǵy men «Býrabaı Damý» kásiporny - elimizde týrızmdi damytýǵa, ásem tabıǵatty qorǵaýǵa erekshe úles qosyp júrgen irgeli mekemeler. Bıyl qańtar-qazan aılarynda ulttyq parkke kelýshilerdiń jalpy sany 600 myńnan asty. Árıne, Saryarqanyń jaýhary sanalatyn ólkege halyqtyń qyzyǵýshylyǵy artyp kele jatqany qýantady. Degenmen, adam aıaǵy kóbeıgen saıyn, tumsa tabıǵatty saqtaý isine de soǵurlym kóbirek mańyz berýge týra keletinin eskergen jón», dedi Aıbek Dádebaev.
Osyǵan deıin kýrorttyq aımaqta Smart National Park Burabay jobasynyń eki kezeńi júzege asyrylǵan. Úshinshi kezeń sheńberinde ǵylymı-zertteý jumystaryn bastaý, 5 ótkizý-baqylaý beketin avtomattandyrý, qorshaǵan ortany baqylaýǵa jáne monıtorıng jasaýǵa arnalǵan 3 beınekamera qoıý syndy ınfraqurylymdyq jumystar qolǵa alyndy.
«Bıyl on aıda ulttyq park aýmaǵyndaǵy týrıstik marshrýttarmen serýendegen adamdardyń sany 33 myńnan asyp tústi. Halyqtyń qyzyǵýshylyǵy joǵary ekenine kóz jetkizildi. Sol úshin Shýche jáne Býrabaı kólderin aınala salynǵan velojoldar men jaıaý júrginshilerge arnalǵan soqpaqtar áli de uzara túsip, Aqbýra kýrortyna deıin jetýge tıis. Aldaǵy ýaqytta qosymsha 8 sholý alańyn, kólik qoıatyn 4 alań salynady dep josparlanyp otyr», dep bólisti QR Prezıdentiniń Is basqarýshysy.
Sondaı-aq kýrorttyq aımaqta baılanys pen ınternet júıesin jetildire túsý úshin jańadan uıaly baılanys stansııalary salynyp, burynǵy bazalyq stansııalardy jańartý josparlanyp otyr.
«Jylma-jyl orman alqabyn ulǵaıtyp otyrý isi de jospar boıynsha júrip jatyr. Bıyl Aqylbaı orman sharýashylyǵynyń aýmaǵynan jańa tálimbaq salýǵa 50 gektar jer belgilendi. Ormanshylar turatyn kordondar men keńselerdiń birazy jańaryp, 6 orman sharýashylyǵynyń ınspektorlary jańa qonysqa kóship úlgerdi», dedi Aıbek Dádebaev.
