Tusaýkeser rásiminde jýrnaldyń «Ál-Jábrdiń atasy» dep atalý sebebine toqtalǵan bas redaktor, belgili matematık, akademık Asqar Jumadildaev «Ataqty «Ál-jábr ýá-l mýqabála» kitabynyń avtory Muhammed ál-Horezmı Aral teńizi mańyndaǵy Horezm shaharynda dúnıege kelgen. Turan jerinde týyp, álemdik órkenıetke orasan zor úles qosqan oıshyl búkil álemge ortaq tulǵa. Sondyqtan jýrnaldyń ataýyn álemge aty máshhúr ǵalymnyń atymen atadyq. Meniń bala kúnimde – «Qazaqstan pıoneri», «Baldyrǵan», «Bilim jáne eńbek» sııaqty bizder oqıtyn eki-úsh jýrnal bolatyn. Elimizde 10 myńnan asa gazet-jýrnal shyǵady eken. Biraq sonyń arasynda ǵylymǵa arnalǵan jýrnal da, gazet te joq. Sol sebepti osy jýrnaldy shyǵarýdy maqsat ettim. «Qalan.kz» platformasynyń qoldaýymen osy oıymdy júzege asyrý múmkindigi týdy», dep máseleniń mánisin túsindirdi.
Jýrnaldyń ǵylymı redaktory Asyltaı Tasbolat ózderiniń turaqty aıdarlarymen tanystyryp ótti. «Zertteýler» aıdarynda jer planetasyna qatysty derekter, matematıkamen tyǵyz baılanysty fızıka, astronomııaǵa baılanysty maqalalar jarııalanyp, ǵylym salasynda jetistikke jetken jastardy nasıhattaý da nazardan tys qalmaıdy. Ulttyq ǵylym akademııasymen birlesken jobalar, «Ǵylym qazyǵy», «Qateni tap», «Qazaqy ólshemder», «Jańarǵan ulttar», sondaı-aq «Ál-Jábrdiń termınkomy» aıdarlary balalar úshin tartymdy maqalalarmen erekshelenbek.
Shyǵarýshy redaktor Oralaı Aleıdarovanyń aıtýynsha, jýrnaldy shyǵarmastan buryn ǵylymdy nasıhattaıtyn basylymdarǵa sholý jasalyp, jarııalanatyn maqalalarda oqýshylardyń jas erekshelikteri de eskeriletin bolady. Ondaǵy maqalalar balalarǵa túsinikti tilmen, kóńilge qonymdy etip jazylǵan. Al árbir maqala Rábıǵa Satybaldy salǵan ıllıýstrasııalarmen bezendirilip otyr.
Jýrnaldy tanystyrý rásiminde «Qalan.kz» jarııalaǵan matematıkalyq olımpıadanyń bıylǵy jeńimpazdaryna aqashalaı syılyqtar tabys etildi.
ALMATY
