Dodanyń alǵashqy kúninde rıng tórine 48, 54, 67, 75, 86 kg salmaqtaǵy sportshylar 1/8 fınaldyń jekpe-jekterin ótkizdi.
Týrnır barysynda el chempıony Nursultan Altynbek (54 kg), «Elorda Cup» básekesiniń jeńimpazy Tımýr Qabdesh (54 kg), jastar arasynda Qazaqstan chempıony Armat Armanuly (75 kg), Tımýr Nurseıitov (75 kg), Amanbek Qazanǵapov (86 kg) syndy tájirıbeli boksshylar jarysty sátti bastady. Al 75 kılo salmaqta favorıtterdiń qatarynan sanalǵan Aıatýlla Tákijanov tartysty aıqasta jastar arasyndaǵy Azııa chempıony Baqbergen Álıasqarovqa 1:4 esebimen jol berdi.
Jarystyń ekinshi kúninde 51, 57, 60 jáne 71 kg salmaq dárejesindegi boksshylarymyz synǵa tústi. Endi 51 kg salmaqta álem chempıony Sáken Bıbosynov shırek fınalda 20 jastaǵy Pavlodar boksshysy Ǵabbas Dıýsekenovpen judyryqtasady. Taǵy bir álem chempıony Sanjar Táshkenbaı da byltyrǵy Qazaqstan chempıonatynyń fınalısi (54 kg) Bekzat Aldamjarovpen jolyǵady. Sebebi Ǵ.Dıýsekenov pen B.Aldamjarov alǵashqy jekpe-jekterinde qarsylastarynan aılasyn asyrdy. 57 kg salmaqta Álisher Nurtazınnen basym túsken Dýlat Turlybekulynyń endigi qarsylasy álem chempıony Mahmud Sabyrhan bolmaq.
Al 60 kg salmaqta Qazaqstan chempıony Ádilet Qurmetov pen 19 jastaǵy Almat Ábdýalı arasyndaǵy aıqasta kútpegen nátıje tirkeldi. Shoqyr Bóltekuly týrnıriniń jeńimpazy Almat tájirıbeli qarsylasynan basym túsip, júldeden dámeli jastardyń bar ekenin taǵy bir dáleldedi.
Sondaı-aq 71 kg salmaqta 2021 jylǵy Qazaqstan chempıonatynyń fınalısi Qýan Qýatov eki jyl qatarynan el birinshiliginiń qola júldegeri Farrýh Toqtasynovqa jol berip, jarysty erte aıaqtady.
Jalpy, burnaǵy kúni favorıtterdiń qatarynan sanalǵan Erbolat Sabyr, Asyljan Serikbaı, Talǵat Syrymbetov, Darhan Dúısenbaı, Talǵat Shaıken kelesi kezeńge súrinbeı ótti.
Keshe 63,5, 67, 80, 92, +92 kg salmaqtaǵy Sanatáli Tóltaev, Serik Temirjanov, Muhammedsabyr Bazarbaıuly, Dýlat Bekbaýov, Bekzat Nurdaýletov, Tursynbaı Qulahmet, Bekbolat Ábdikerim syndy álemde, Azııada, Qazaqstan chempıonatynda júlde alyp júrgen tanymal boksshylar rıng tórine kóterildi.
63,5 kg salmaqtaǵy Qazaqstannyń birneshe dúrkin chempıony, álem chempıonatynda eki ret qatysqan S.Tóltaev aldaǵy ýaqytta bapkerlerdiń kózine túsý úshin tájirıbesin shyńdamasa bolmaıtyn sekildi. Sebebi ol spartakıadaǵy alǵashqy aıqasta almatylyq Jandos Qydyrálıevten aılasyn asyra almaı, jarysty erte aıaqtady.
Al álem jáne Azııa chempıonatynyń kúmis júldegeri Serik Temirjanov Astana tórindegi dodada 57 kg-dan 63,5 kg salmaqqa aýysyp, alǵashqy kezdesýin ótkizdi. Aıaqalysy da jaman emes. Jambyldyq sport sheberi Almas Dúısenqulǵa qarsy ótkizgen Serik úsh raýnd boıy belsendi boldy. Birese oń qolmen, birese sol qolmen dál soqqy jasap tóreshilerdiń kózine tússe, ekinshi raýndta jaqyn qashyqta júrip, A.Dúısenquldyń betin qyzanaqtaı qyzyl etti. Biraq jańa salmaqqa aýysqan Serikke álemdik deńgeıde óner kórsetý úshin áli de tájirıbesin shyńdaı túsý kerek sekildi kórindi, bizge.
Keshki sessııada ótken qalǵan birneshe mańyzdy jekpe-jektiń nátıjesin gazetimizdiń kelesi nómirinde jarııalaıtyn bolamyz.
