El chempıondary anyqtaldy

Erler arasynda Mańǵystaý oblysynyń quramasy eki altyn medaldy oljalap, jalpy komandalyq esepte kósh bastady. Qart Kaspııdiń jaǵalaýynan kelgen jigitterdiń arasynan Asqar Narqulov pen Meıirlan Maksımniń mereıi ústem boldy. 73 kg salmaqta kúresken Asqar aqtyq synda jetisýlyq Darhan Qoıbaǵarovty qapy qaldyrsa, 81 kg salmaqtaǵy Meıirlan abaılyq Jalǵas Qaırollany jyqty. Bul salmaq dáreje­lerinde qola medaldi semeılik Qýan Barys (73 kg) pen Almaty obly­synyń ókili Islam Toqta­syn (73 kg) jáne oraldyq Ańsar Ǵaınýllın (81 kg) men astanalyq Mádı Aman­geldi (81 kg) ıelendi.

Jambyl, Qyzylorda jáne Qaraǵandy oblysynyń balýandary birdeı nátıje kórsetti. Olardyń árqaısysy 1 altyn men 1 qolany qorjynǵa saldy. Áýlıeata topyraǵynan kelgen apaıtóster arasynan 60 kg salmaqtaǵy Qanat Serikbaevtyń ekpinine eshkim shydamady. Halyqaralyq arenada tabysty óner kórsetip júrgen qandasymyz fınalda Erjan Erenǵaıypovty (Astana) eńserdi. Myńbolat Meırambekov (Qyzylorda) pen Dáýren Súıekenov (Almaty oblysy) úshinshi satyǵa taban tiredi. Syr boıy saıypqyrandary arasynda asa aýyr salmaqtaǵy Elaman Erǵalıevtiń shoqtyǵy bıik boldy. Kezinde «Qazaqstan barysy» atanǵan túıe balýa­n sheshýshi tusta tájirıbeli Ádil Orazbaevty (Abaı) taza tas­tap, ıpponmen utty. Mádı Edilbaev (Almaty oblysy) pen Ǵalymjan Qyryqbaı (Jam­byl) qola medaldy moınyna ildi. Qaraǵandynyń bapkerleri bul joly da Azııa oıyndary men qurlyq chempıonatynyń júldegeri, eki birdeı Olımpıa­daǵa qatysqan Islam Bozbaevqa senim artty. 100 kg salmaqta aıqasqan 32 jastaǵy saqa sportshy sol senimdi tolyǵymen aqtady. Fınalda Islam Ádilet Saparǵalıevke (Atyraý) san soqtyrdy. Ermahan Estaı (As­tana) men Bekzat Shaǵataev (Atyraý) qolaǵa qol sozdy.

Aqtóbe óńiriniń órenderi bas júldeniń bireýin enshiledi. 66 kg salmaq dárejesiniń fınal­dyq saıysynda Nursultan Zaızaǵalıevti súrindirgen Eset Qýanov óz kórermenderin qýantty. Elaman Sultanbaı (Al­maty oblysy) men Almas Ǵa­lymov (Abaı) úshinshi satyǵa turaqtady. Túrkistandyq tar­landardyń da kórsetkishi dál sondaı. 90 kg salmaqta saıysqa túsken Aıdar Arapovtyń aıdarynan jel esti. Ermahan Ánýarbekov (Abaı) kúmispen kúptelse, Asqar Birjanov (Qaraǵandy) pen Qu­dyret Dosymov (Shymkent) qola medaldy ıemdendi.

Áıelder saıysynda Jetisý oblysynyń burymdylary óte keremet óner kórsetti. Sarapqa salynǵan jeti bas júldeniń úsheýin solar oljalady. Atap aıt­saq, Dıana Býrkeeva (48 kg), Nursulý Eralıeva (52 kg) jáne Kámıla Berliqash (+78 kg) qar­sylas shaq keltirmedi. Fı­nalda Nursulý elimizdiń tanymal dzıýdoshysy, Eýropa kýbo­giniń ıegeri, Portýgalııada ótken Gran-prı týrnıriniń kúmis júldegeri Ǵalııa Tynbaevany tize búktirse, Kámıla óziniń syralǵy qarsylasy, ulttyq komandanyń múshesi Nazgúl Maratovany súrindirdi.

Aqtóbeniń eki arýy altynnan alqa taqty. Olar – Baqyt Qu­saqbaeva (57 kg) men Arýna Jangeldına (78 kg). Bul jarysta Baqyt álem chempıonaty men Azııa oıyndaryna qatysýshy Sevara Nyshanbaevadan aılasyn asyrdy. Atyraýlyq Esmıgýl Kýıýlova (63 kg) men Almaty oblysynyń ókili Ekaterına Tokareva da (70 kg) barlyq básekelesinen basym túsip, jeńis tuǵyrynyń eń bıik satysyna kóterildi.

Osy oraıda myna bir oqıǵa eske túsip otyr: HH ǵasyr­dyń toqsanynshy jyldarynda Qazaqstannyń ulttyq qura­ma komandasynyń sapynda Janarbek Qońyrbaev pen Gúlnar Ysqaqov esimdi erli-zaıypty samboshylar óner kórsetken edi. Ekeýi de el chempıonatynda top jaryp, halyqaralyq arenada azdy-kópti tabysqa qol jetkizdi. Kúni keshe Astanada ótken el birinshiliginde de dál sondaı jaǵdaıdyń kýási boldyq. Asa aýyr salmaqta aldyna jan salmaǵan Kámıla Berliqashtyń kúıeýi Islam Toqtasyn 73 kg salmaqta beldesip, qola medaldy moınynda jarqyratty.

Taǵy bir aıta keterlik jaıt, Eldos Smetov, Maǵjan Sham­shad­dın, Ǵusman Qyrǵyzbaev, Ábıba Ábýjaqynova, Danııar Shamshaev, Nurlyhan Sharhan syndy Qazaqstannyń bir top beldi balýandary túrli sebepke baılanysty Astanada ótken jarysqa qatysqan joq.