«Asyqata» aýrýhanasynda bosanǵan 35 jastaǵy Gúlmıra Iztileýova otbasymen keńese kele, ulǵa Álimhan dep at qoıypty. Bul Shakenovter otbasyndaǵy tórtinshi bala. Bes qursaq kótergen ananyń, ókinishke qaraı, bir sábıi shetinep ketken eken. Dúnıe esigin ashqan kezdegi salmaǵy – 3400 gramm, boıy 51 santımetr bolǵan Álimhannyń anasy Gúlmıra «Jeńis» jalpy orta mektebinde bıologııa pániniń muǵalimi bolsa, ákesi Erǵalıdyń turaqty jumysy joq. Ázirge jas otbasy «Dıplommen – aýylǵa!» baǵdarlamasymen shalǵaıdaǵy aýyldarǵa barýdy nıet etip otyr. Úsh ul men qyzdyń atasy Asqar jáne ájesi Ońalaıdyń da qýanyshynda shek joq. Otbasyndaǵy úshinshi balanyń el halqynyń sanyn jıyrma mıllıonǵa jetkizip, búkil eldi qýantqanyn maqtan etedi.
Túrkistan oblysynyń ákimi Darhan Satybaldy Jetisaı aýdanyndaǵy «Asyqata» aýrýhanasyna arnaıy baryp, sábıdiń ata-anasyn quttyqtady. «Búgin Prezıdentimizdiń quttyqtaýyn saltanatty túrde jetkizý úshin kelip turmyz. Uly dala irgesi urpaǵymen berik. Qasıetti Túrkistan óńirinde Qazaq eliniń 20 mıllıonynshy turǵyny týǵanyna óte qýanyshtymyz. Biz batyr analarymyzben maqtanamyz. Jyl saıyn respýblıkamyzda dúnıege keletin 400 myńnan astam balanyń árbir jetinshisi Túrkistan oblysynda dúnıege keledi. Búginde oblys halqynyń sany 2 mıllıonnan asty. Túrkistan óńiri elimizde adam kapıtalyn kóbeıtýge aıryqsha úles qosyp jatyr. Bul – elimiz úshin, biz úshin maqtanysh. Sizder búgin tarıhqa enip otyrsyzdar», degen Darhan Satybaldy 20 mıllıonynshy turǵynnyń ata-anasyna Prezıdent atynan baǵaly syılyq usynyp, «Otbasy bank» atynan taǵaıyndalǵan 2 mln teńgeniń sertıfıkatyn tapsyrdy.
Túrkistan oblysy
