Ǵylym men óndiristiń ilgerilep jatqanyn aıǵaqtaıtyn bul bastama L.N.Gýmılev atyndaǵy EUÝ ǵalymdaryna tıesili. Talapshyl ǵalymdar el naryǵyndaǵy tuńǵysh radıasııalyq tigilgen oqshaýlaǵyshy bar kábildik-ótkizgish óniminiń jańa túrin óndirýshilermen birlesip jasap shyǵardy. О́nimniń jobalyq qýaty 15 myń shaqyrymǵa deıin barady. EUÝ janyndaǵy «Iаdrolyq tehnologııalar parki» aksıonerlik qoǵamy ǵalymdary fotoelektr júıelerine arnalǵan kábilderdi ázirleý tehnologııasyn jasaýda úlken zertteý jumystaryn júrgizgen. Onyń paıdalaný qasıetterin, ystyqqa tózimdiligin jaqsartqan. Bul ınnovasııalyq ónim balamaly energııa kózderi salasynda qoldanylady.
– Biz buryn-sońdy Qazaqstanda kábil ónimderin óndirýde qoldanylmaǵan radıasııalyq tigý tehnologııasyn qoldanamyz. Totyǵý degradasııasyna jol bermeý úshin óńdeý ınertti ortada júrgiziledi. Bul óndiris ádisi bizdiń elde qoldanylmaıdy. Biz ELV-4 elektrondy údetkishinde qorǵanysh ortada kábil ónimderiniń polımerli oqshaýlaýyn modıfıkasııalaý jobasyn «QazElektroMashpen» birlese júzege asyryp jatyrmyz. Qysqa tuıyqtalý kezindegi termııalyq turaqtylyqtyń joǵary togi, tómen zaqymdaný jáne tómen gıgroskopııalyq, kábildik buıymdardyń úlken qurylys uzyndyǵy men tómen salmaǵy, jumys rejimindegi oqshaýlaýdyń ruqsat etilgen temperatýrasynyń joǵarylaýyna baılanysty júkteme qabiletiniń joǵarylaýy – bul bizdiń ónimniń aıryqsha erekshelikteriniń bir parasy ǵana, – dedi «Iаdrolyq tehnologııalar parki» jobalaý tobynyń basshysy, «Beta izol» dırektory Azat Nurqasymov.
Aıta keteıik, fotoelektr júıelerine arnalǵan kábildi EUÝ janyndaǵy «Iаdrolyq tehnologııalar parki» men «QazElektroMash» birge qurǵan «Beta izol» startap-kompanııasy shyǵarady. Qazirgi kezeńde kórshi elderde otandyq osy ónimdi satyp alýǵa degen úlken suranys bar.
