FOTO: steppe.com
Almaty qalasy Týrızm basqarmasynyń málimeti boıynsha Kishi, Úlken Almaty, Prohodnoe, Býtakovka shatqaldary aımaǵynda jumystar aıaqtalyp, Qarǵaly shatqalyndaǵy abattandyrý jalǵasyp jatyr. Týrısterdi tartýdyń jańa núktesi Ǵarysh stansasyna barar jolda teńiz deńgeıinen 2 500 m bıikte ornalasqan belgili shyńdarǵa jaqyn. Bul – «Jartasty» shyńy (3 332 m), «Kroshka» shyńy (3 722 m), «Sovetov» shyńy (4 317 m), «Ozernyı» shyńy (4 126 m).
«Kempıng – taýdaǵy demalys, trekıng, haıkıng áýesqoılary úshin jabdyqtalǵan alań. Týrısterdiń jaıly jáne qaýipsiz demalysy úshin shatyrlar qurylyp, samaljaılar ornatylǵan. Biz taý ınfraqurylymyn damytýǵa erekshe nazar aýdara otyryp, týrıster úshin jańa baǵyttar qurý boıynsha jumys istep jatyrmyz. Baǵyttar boıy aqparattyq stendter, kórsetkishter, qalqandar ornatyldy. Navıgasııalyq stendterde QR-kodtar bar, onda týrıster baǵyttyń kúrdeliligimen, uzaqtyǵymen jáne ótý ýaqytymen tanysa alady. Kempıng aımaqtary týraly aqparat 2GIS-te jáne kartografııalyq platformalarǵa qosyldy», deıdi Týrızm basqarmasynyń basshysy Ǵalııa Toqseıitova.
Osy oraıda basqarma ókilderi demalýshylardan tabıǵatqa janashyrlyqpen qaraýdy, taýda qoqys qaldyrmaýdy suraıdy, sondaı-aq taý joryqtary kezinde qaýipsizdik erejeleriniń saqtalýyn eske salady. Mysaly, serýendeýshiler taýǵa bara jatqanda óz baǵyty jóninde jaqyndaryna habarlaý qajet. Buǵan qosa aýa raıyna saı kıinip, ózimen birge qajetti qural-jabdyqtar, bas kıim, sý, tamaqtaný jáne portatıvti zarıadtaǵyshpen zarıadtalǵan telefon alýdy umytpaý kerek.
Jalpy, Almatyda 2023 jyldyń 1 jartyjyldyǵynyń qorytyndysy boıynsha týrıster sany 972 157 adamdy qurady. Onyń ishinde sheteldik týrıster sany – 261 571 adam. Bul ótken jylmen salystyrǵanda 72,6%-ǵa ósip otyr. Al ishki týrıster sany – 710 586 adam, bul kórsetkishtiń ósimi – 14%. Osynaý derekter týrıster sanynyń jalpy dınamıkasy 25,5%-ǵa óskenin kórsetedi. Kelýshilerdiń eń kóbi Reseıden (39,2%), Qytaıdan (9,2%), Úndistannan (7%), Túrkııadan (6,6%), AQSh-tan (3,4%), Ońtústik Koreıadan (3,2%), О́zbekstannan (2,9%), Qyrǵyzstannan (2,8%), Germanııadan (2,5%) kelgen.
