Qos áýlettiń tatý-tátti, aýyzbirshiligi mol kórshiligi aýyldan 25 shaqyrym qashyqta ornalasqan Myrzahmet qystaǵynan bastaý alǵan. Osy jerge qoıshy otbasylar Oryn men Márııa Saparalıevter, Qýan men Máýııa Tóleshbaevtar ujymshardyń otaryn baǵyp, kásip etedi. Eńbekqor jandardyń qoı sharýashylyǵynda úzdik atanyp, joǵary kórsetkishterge qol jetkizgenine kópshilik kýá. Irgeles ornalasqan qos áýlettiń ul-qyzdary kishkentaı kezinen bir úıdiń balasyndaı bolyp, qulyn-taıdaı tebisip, birge ósti, jetildi. Armandary da bir edi – baýyryndaı bolyp ketken kórshilermen jarasymdylyǵy úzilmeı, ósken soń bir-birinen kóz jazyp qalmaý.
Eki otbasynan órgen urpaqtyń ózi – shaǵyn aýyldyń jurtyndaı. Atap aıtsaq, Oryn ata men Márııa ájeıden 5 ul, 3 qyz, 18 nemere-jıen, 19 shóbere, 14 jıenshar taraǵan. 6 ul, 3 qyz dúnıege ákelip, tárbıelep ósirgen Qýan ata men Máýııa ájeniń de shańyraǵy qut pen berekege toldy. 9 perzentten 27 nemere-jıen, 7 shóbere, 20 jıenshar kórinipti. «Kóńil syısa, bári syıady» degen ras eken, osynshama perzentti qos áýlettiń japsarlas ornalasqan qara shańyraǵy ataýly kúnde qushaǵyn aıqara ashyp, qarsy aldy.
– Ata-ájelerimizdiń kórshiles qonys tepkenine 45 jyl tolǵanyn atap ótýdi qara shańyraqqa ıe bolyp qalǵan aǵamyz Sándibek Saparalıev pen kórshi aǵamyz Mereke Tóleshbaev áýelden oılastyryp qoıdy. Olar bastap, biz de qostap, belgili kúnge kelisip, alys-jaqynnan aǵyldyq. О́zderi bólek shańyraq kótergen ata-analarymyzdyń balalyq shaǵyn birge ótkizgen baýyr-qurbylarymen júzdeskendegi qýanyshyn sózben jetkizý múmkin emes. Qaıta-qaıta birin-biri qushaqtap, balalyq shaqtaryn sondaı erekshe saǵynyshpen eske alyp, birge ótkizgen kúnderiniń qyzyq ta ystyq estelikterin aqtardy. Urpaqqa jalǵasqan syılastyq, qurmet dep bilemin, qos áýlettiń ul-qyzy túgil, nemere-jıenderi biz de bir-birimizge baýyrdaımyz, – deıdi Saparalıevterge nemere Álı Orynov.
Búginde qos áýlettiń ul-qyzdarynyń aldy zeınet jasynda, keıbireýleri Oral men Aqtaý qalalarynda tursa, qalǵany ataqonystan kóp alysqa ketpegen – Qamystykól men Kónekketkende. Kezinde ataqty qoıshy bolǵan Oryn men Qýan ata, Saparalıevter áýletiniń abzal anasy Márııa áje búginde joq. Osy qýanyshty kúnde qos áýletten taraǵan urpaq tórdiń sánin keltirgen Máýııa ájege balalyq rızashylyǵyn arnap, syı-qurmetke bóledi.
Baýyrlar bas qosqan dastarqan basynda izgi tilekter, aq peıildi estelikter aıtylyp, án shyrqalyp, dóńgelenip bı de bılendi. Bul toıdy tipti bir týǵan baýyryń jat bolyp bara jatqan qazirgideı zamanda jarasymdylyqtyń, adamı qurmettiń qandaı bolatynynyń úlgisi dep eseptedik.
Álııa ShARAPIEVA
Batys Qazaqstan oblysy,
Aqjaıyq aýdany
