Sýret Dıana Rústemovanyń jeke muraǵatynan alyndy
21 jastaǵy Dıana Rústemova «Ashtyq oıyndary» prıkvelinde qosymsha rólde oınaǵan jalǵyz qazaq qyzy atandy. Boıjetken úsh jyldan beri Berlınde rejıssýra mamandyǵy boıynsha bilim alyp keledi, al bos ýaqytynda kınoda qosymsha rólderge túsedi.
«Men 2022 jyly fılmderde massovkaǵa túse bastadym. Ol úshin aldymen arnaıy platformada anketany toltyryp, ózińniń sýretterińdi júkteý qajet. Eger syrtqy parametrlerge saı bolsań, túsirilimge qatysýǵa shaqyrý jiberedi», deıdi boıjetken.
Buǵan deıin Dıana «Bamper» fılminde, ıtalıandyq telehıkaıalarda jáne eýropalyq fılmderde qosymsha rólderdi somdady.
«Ol fılmderde meniń beınem kórinbegen edi. Al «Ashtyq oıyndarynda» men ózimdi alǵash ret ekrannan kórdim. Massovkada negizinen kóriný múmkindigi óte az. Túsirilim alańynda men jalǵyz qazaq boldym. Meniń oıymsha, bul biregeı múmkindik jáne tańǵajaıyp tájirıbe», dep atap ótti ol.
Dıananyń aıtýynsha, qosymsha toptyq rólderdi túsirý shamamen eki aptaǵa sozylǵan.
«Bizge saǵat 06:00-de qońyraý shaldy. Túsirilim alańyna ózimiz baryp júrdik, túsirilim kúnine 12-13 saǵattan boldy», dep eske alady ol.
Sondaı-aq Dıana somdaǵan róli úshin jalaqy da jaqsy tólengenin aıtty.
«Olar 12 saǵattyq túsirilim úshin kúnine 120 eýro tóledi. Keıbir kúnderi oqýyma baılanysty túse almaı qaldym. Bizde óte kóp dýbl boldy. Basty keıipkerdegi akterler de qaıta-qaıta dýbl jasap jatty. Men túsken 2 sekýndtyq beıneni úsh saǵattap túsirdik. Bir kúnimiz bes sekýndtyq bir kóriniske arnaldy», dep túsindirdi boıjetken.
Dıana Rústemova Germanııada tájirıbe jınaqtap, jaqyn arada Qazaqstanǵa oralýdy josparlap otyr. Sondaı-aq Dıana TıkTok paraqshasynda ózi túsken kórinistiń vıdeosyn jarııalaǵan edi.
