Asyl Suńǵatqyzy «Telefon – tárbıe quralyna» aınalǵan tusta, kólemi kóp, deregi dastandarǵa júk bolatyn ulttyq qundylyqtarymyz ben mádenıetimizdi búgingi býynǵa tóte túsindirýdiń tıimdi úlgisin salýǵa den qoıǵan. Toǵyzynshy synyp oqýshysy buǵan deıin 2 komıks albomdy kópshilik nazaryna usynyp úlgerdi.
«Internet damyǵan zamanda kópshilik uzyn-sonar mátindi oqyǵysy kelmeıdi. Bizdiń elde keń tanyla qoımasa da komıks arqyly qysqa ýaqytta aqparatty tez jetkizýge bolady», deıdi Asyl Suńǵatqyzy.
Asyl О́skemen qalasyndaǵy Sh.Ýálıhanov atyndaǵy mekteptiń 9-synyp oqýshysy. Ol sýret salýǵa bala kúninen áýes bolǵan. Ata-anasy Asyldyń bul qabiletin ańǵaryp, talantyn shyńdaýǵa árdaıym qol ushyn sozyp júr.
Sózi az, sýreti kóp bul janrda sheberligin shyńdap kórýdi Asylǵa ustazy, «Egemen Qazaqstan» gazetiniń menshikti tilshisi Mereı Qaınaruly usynypty. Ol Asylǵa alǵashynda komıks, karıkatýra negizin úıretip, baǵyt bergen. Eńbekqor qyz, ustazy nusqaǵan joldan taımaı tarıhty sýretpen sóıletip, tulǵalardyń san-qyryn tanytyp júr.
Asyldyń tuńǵysh komıks-albomy Alash kósemi Álıhan Bókeıhanovtyń 155 jyldyq mereıtoıyna arnalypty. «Alash kósemi» atty komıksinde qaıratkerdiń tulǵalyq san qyryn sýret arqyly sheber ashqan. Al, ekinshi týyndysy byltyr jaryq kórgen «Er Tóstik» ertegisi.
Asyl Suńǵatqyzynyń kezekti albomy aqyn Maǵjan Jumabaevtyń 130 jyldyǵyna arnalǵan. Ol bul týyndysyn 7 aı boıy daıyndaǵan.
«Meniń komıks týyndylarym jas talǵamaıdy. Úlken de, kishi de komıksti kórip otyryp, mol maǵlumat alyp qana qoımaı, ýaqytyn únemdeıdi. Máselen, meniń synyptas dostarym albomdarymnyń tanystyrylymynan qalmaı keledi, shyǵarmashylyǵym olarǵa árkez qyzyq. Meniń maqsatym komıksterim arqyly tarıhqa jalpy jurtty qyzyqtyrý, kitap oqýǵa bastama bolý», deıdi ol.
Sondaı-aq oqýshy «stıker pak» jasap júr. Japsyrma qaǵazdarǵa Alash qaıratkerleri aıtqan asyl sózder men avtordyń portretin basyp shyǵaryp, zamandastaryna taratady. Ataly sózdi aýdıtorııaǵa qaraı ıkemdegen Asyl sıfrlyq dáýirde tarıhty oqytýda jańa sheshiminiń bolýy mańyzdy ekenin jetkizdi.
Asyldyń bul týyndylaryna qyzyǵyp, seriktestik usynýshylar qatary qalyń. Sýretshi qyz kezekti ret Qazaq camel fırmasyna arnap komıks qurastyryp, qarjylaı tabys tapqan. Ol, sonymen birge, komıks-albomdar men «stıker paktardy da» satyp alýshylar kóp ekenin aıtty.
Al, Asyldyń ustazy Mereı Qaınaruly komıks - jastardyń oqýǵa yntasyn arttyratyn tıimdi qural deıdi.
«Komıks – bolashaǵy zor janr. Alaıda janrdyń jetkilikti baǵalanbaı otyrǵany alańdatady. Máselen, ádette «Abaı joly» romanyn oqýǵa 2 aı ketse, komıks arqyly 1 aptada oqyp támamdaýǵa bolady. Bizge shet eldiń komıksterin aýdarýdy doǵaryp, tól komıksterimizdi shyǵarýdyń kezi jetti», dedi Mereı Qaınaruly.
Mereı Qaınaruly áli kúnge Asyldyń shyǵarmashylyǵyn shyńdaýdan qol úzbegen. Ol endi Asylǵa Berdibek Soqpaqpaevtyń, Marat Qabanbaevtyń balalarǵa arnalǵan áńgimelerin komıkske aınaldyrýdy usynǵan.
Asyldyń aldaǵy armany − ǵalamtor keńistiginde balalarǵa arnalǵan qazaq tildi kontentti kóbeıtý.
