Joltaı – saıyn Saryarqanyń shuraıly bir aımaǵy, qoınaýy yrys, jaılaýy tynys Jańaarqa aýdany Qaraaǵash aýylynyń týmasy. Ákesi Boranqul ótken ǵasyrdaǵy kolhoz, sovhoz sharýashylyqtarynyń qalyptasý, damý kezeńderiniń barlyǵyn óz qolymen ótkergen, qandaı jumysqa bolsyn ilkimdi, ismer, sheber, sharýaqor adam edi. Árdaıym, jyldyń tórt mezgili, tańnyń atysy kúnniń batysy, biri aıaqtalsa ekinshi bastalyp jatatyn naýqandyq jumystardyń basy-qasynda júretin. Aınalasyndaǵy aǵaıyn-týǵandy, otbasyn úıirip ustaıtyn, aralaryn jarastyryp, týystyq tinin bekitip otyratyn bedeldi aqsaqaldyń osy eńbeksúıgishtik qasıeti barsha balalaryna da juǵysty boldy. Joltaı jastaıynan aıyr, kúrek turmaq, aýyl sharýashylyǵynyń barlyq óndirisine kózi qanyqty, etene bolyp ósti.
On jyldyq mektepten soń aýdan ortalyǵyndaǵy mehanızatorlar daıarlaıtyn kýrsty oqyp bitirdi. Úlken eńbek jolyn týǵan aýylynda mehanızator bolyp bastady. T-40 traktorynyń rýline otyryp shóp shapty. Alyp K-700 traktoryn tizgindep, jer jyrtty, sharýashylyq ónimderin tasymaldady. Aýyl dáýletiniń eselep artýyna eleýli septigin tıgizdi. 1979-1981 jyldar aralyǵynda ásker qatarynda azamattyq boryshyn ótedi.
1987 jyly aýdan ortalyǵy Atasý kentine qonys teýip, temir jol salasynyń qalpyna keltirý poıyzy mekemesine T-330 býldozeriniń mashınısi bolyp jumysqa ornalasty. Sodan beride, bıylǵy zeınet jasyna jetkenge deıin osy mekemede taban aýdarmaı, qaltqysyz qyzmet atqardy. Uzaq jyl sonarynda ortaq iske degen úlken jaýapkershilik, tııanaqtylyqpen eńbek ete júrip, kásiporynnyń maıtalman mamandarynyń birine aınaldy.
Jańaarqa stansasyna qarasty qalpyna keltirý poıyzynyń irgetasy 1936 jyly qalanypty. Qozǵalys bolǵan soń qaýip bolmaı turmaıdy. Temir jol torabynda qandaı da bir apat oryn ala qalǵan jaǵdaıda onyń saldaryn joıý mindeti eń aldymen osy qalpyna keltirý poıyzyna júkteledi. Sol yńǵaıda jelilik qalpyna keltirý poıyzy tasymaldy toqtaýsyz júrgizý isine laıyqty úles qosty. Mejesi bıik, jumysy júıeli, jetistikteri eseli, birligi myqty ujym árdaıym senim údesinen, jeńis tuǵyrynan kórine bildi. Osyndaı tolaıym tabystarda bilikti maman, isker azamat J.Ysqaqovtyń da ózindik qoltańbasy bar.
«El seniminen shyǵý jolynda jumylǵan judyryqtaı jumys isteý – basty mindet. Bekitilip berilgen tehnıkany saqadaı saı daıyndyqta ustaý úshin onyń kútimine asa uqyptylyqpen qaraý qajet. Buzyla qalsa, aqaýy bolsa mezgilinde jóndep qoıý kerek. Mekeme kezekshisine apat týraly habar túsisimen, kúndiz-tún demeı, 40 mınýtta jınalyp jolǵa shyǵyp ketemiz», deıdi Joltaıdyń ózi.
Eseli eńbek baǵalanýymen baıandy. 40 jylǵa jýyq ýaqyt bir mekemede, bir orynda tapjylmaı, qapysyz qyzmet ete bilgen tájirıbeli maman, ozat eńbekkerdiń tókken ter, etken qyzmeti birqatar salalyq marapatpen atalyp ótken. Qurmet gramotalary, alǵys hattar, merekelik medaldar legi – óz aldyna bir tóbe. 2011, 2016 jyldary «Qazaqstan temir joly» UK» AQ Prezıdentiniń Qurmet gramotasymen marapattaldy. 2022 jyly Jańaarqa aýdany ákimdiginiń «Jyl úzdigi» atalymy boıynsha «О́z mamandyǵynyń úzdigi» atandy.
J.Ysqaqov sonsha jumystyń syrtynda ónegeli otbasy ıesi, asyl jar, ardaqty áke, ulaǵatty ata. 1988 jyly aýdan turǵyny Lázzatpen januıa qurdy. Erli-zaıyptylardyń berekeli shańyraǵynda eki er bala ósip-tárbıelendi. Úlkeni Jasyn, kishisi Kemel – ekeýi de búginde joǵary kásiptik bilimi bar mamandar, ekeýi de áke jolyn qýyp temirjol torabynda, lokomotıv deposynda mashınıst bolyp jumys isteıdi. Balalary da úılengen, olardan órbigen nemereler – ata-áje kózqýanyshy, úı bazary.
Joltaı aǵa búginde merekesi jarqyn jazdaı, berekesi altyn kúzdeı bolyp jetken mereıtoıy – zeınet demalysyna shyqqan qazynaly qýanyshyn bastan keshirip jatyr. Atpal azamat búkil sanaly ǵumyrynda bel sheshpeı eńbek etip, erdiń eri kóteretin júkti arqalady. Kóńiliniń keńdigi men muqalmas qaırat-jigeri, adamdyq, aǵaıyndyq qatynastardaǵy aqberen adaldyǵy men kishipeıildiligi, sózge sarań, iske myǵym qarapaıym bolmysy, sútteı uıyǵan otbasy berekesi – kez kelgen adamdy qyzyqtyrarlyqtaı úlken tálim-tárbıe úlgisi.
