Bul nagradany «Jas sarbaz» balalar-jasóspirimder qozǵalysynyń tárbıelenýshisi Aqjol Geroıǵa qorǵanys salasynyń basshysy atynan Desanttyq-shabýyldaý áskerleriniń qolbasshysy, general-maıor Almaz Jumakeev tabys etti. Is-sharaǵa Desanttyq-shabýyldaý áskerleriniń qolbasshylyǵy men jeke quramy, Aqjoldyń ata-anasy jáne «Jas sarbaz» qozǵalysynyń tárbıelenýshileri qatysty.
Mınıstr Rýslan Jaqsylyqov «Jas sarbaz» áskerı-patrıottyq klýbynyń tárbıelenýshisi Aqjolǵa batyl is-áreketiniń arqasynda jol-kólik oqıǵasynyń aldyn alǵany úshin alǵysyn aıtyp, izgi tilekterin jetkizgen. «Sizderdiń uldaryńyz syndarly sátte atyna zaty saı naǵyz batyr ekenin dáleldedi» delingen Aqjoldyń ata-anasyna jazylǵan alǵys hatta.
Aıta ketsek, 22 qarashada Almaty oblysynyń Ile aýdanyna qarasty О́tegen batyr kentindegi №24 lıseıdiń 8-synyp oqýshysy Aqjol Geroı №219 baǵdarly avtobýsqa otyrǵan. Jolaı júrgizýshiniń júrek talmasy ustap qalady. Muny baıqaǵan Aqjol júrgizýshi kabınasyna júgirip jetip, tejegishti basyp úlgeredi. Sonyń arqasynda avtobýs turǵyn úı qorshaýyna jarty metr ǵana jetpeı toqtaıdy.
8-synyp oqýshysynyń jedel qımyly zardaby aýyr apattan saqtap qaldy. Oqýshynyń bul batyl áreketi týraly telearnalar men áleýmettik jelilerde jarysa aıtyp jatyr. «El qorǵany» medalinen bólek, jas batyrǵa óz mektebiniń ákimshiligi noýtbýk syılasa, Almaty oblysynyń ákimi Marat Sultanǵazıev Alǵys hat pen sońǵy úlgidegi «iPhone 15» uıaly telefonyn tabys etti.
