Foto: gov.kz
Marat Qarabaev merdigerlerge budan bylaı jol jobalaryna qatysty qoldan qymbatshylyq jasaýlaryna jol berilmeıtinin qatań eskertti.
«Keıbir kompanııalar jumys bastalǵan alǵashqy jyly jumystardy ádeıi keshiktirip, úshinshi-tórtinshi jyly qymbattaý máselesin alǵa tartady. Osyndaı tájirıbege tap bolyp otyrmyz. Bul rette «eń basynda kelisilgen somadan artyq eshteńe berilmeıdi» dep birden aıtamyn. Buryn-sońdy basqa ýchaskelerde, atap aıtqanda, «Qaraǵandy – Balqash» jáne «Taldyqorǵan – О́skemen» ýchaskelerinde jumys istegen áriptesterińizdiń tájirıbesine qarańyzdar. Bul barshaǵa sabaq bolyp, endi qaıtalanbaıdy. Budan bylaı jol jobalaryna qatysty qoldan qymbatshylyq jasaýlaryńyzǵa jol berilmeıdi. Qolyńyzdan kelmese, kelisimshartty buzyp, jumysty sol jerden toqtatyńyz. Bul barlyq merdiger men jol jobalaryna qatysty aıtylyp otyr», dedi mınıstr.
Ol sondaı-aq Kólik mınıstrligi tarapynan jobalar qunynyń qymbattaýynan ózge basqa barlyq másele boıynsha jol qurylysshylaryna árdaıym kómek kórsetýge daıyn ekenin atap ótti.
Marat Qarabaev memlekettik organ teris tájirıbesi bar kompanııalar Qazaqstannyń jańa jol jobalaryna qatysa almaıtyndaı etip zańnamaǵa ózgerister engizýge bastamashy bolǵanyn aıtty.
«Qara tizim» buryn da bolǵan, alaıda qazir atalǵan normany paıdalaný aıasyn odan ári keńeıtkimiz keledi. Sondyqtan elimizge alǵash ret kirip jatqan kompanııalar birden ózderine «Qazaqstanǵa uzaq ýaqyt jumys isteýge keldik pe álde joq pa?» degen suraqqa jaýap berýleri kerek. О́ıtkeni aldaǵy 6 jylda 8 myń shaqyrymǵa jýyq jolda qurylys jumystaryn júrgizý josparlanyp otyr», dep eskertti kólik salasyna jaýapty mınıstr, aıtýynsha merdigerler jobalarǵa tolyqqandy daıyndyqpen kirisý qajet.
